Azərbaycanda partiya və mədəniyyət anlayışları siyasi məfkurə, dövlətçilik prinsipləri və mədəniyyət siyasəti kontekstində bir-biri ilə bağlıdır. Yeni Azərbaycan Partiyası yarandığı gündən milli mədəniyyətimizin inkişafında böyük rol oynamışdır. Partiya dövlətçilik və sosial ədalət prinsiplərinə əsaslanaraq ötən bu illər ərzində hakim partiya kimi, xalqımızın milli-mədəni maraqlarını təmsil etmişdir.
YAP-ın cəmiyyətdəki fəal mövqeyi, onun hüquqi dövlət quruculuğu və ictimai-siyasi proseslərdə iştirakı xüsusilə vurğulanmalıdır. Müstəqil Azərbaycanın memarı və qurucusu Heydər Əliyevin siyasi kursunu uğurla davam etdirən Prezident İlham Əliyevin rəhbərliyi ilə bu gün dövlətimizin başçısının sədri olduğu YAP ölkənin siyasi, sosial-iqtisadi və mədəni həyatında böyük nüfuza malikdir.
Dövlətimizin mədəniyyət siyasəti, mədəniyyət və incəsənətin müəyyən bir konsepsiyasına əsaslanan bütün növ mədəni fəaliyyətin təşkili və idarə olunmasının vahid bir prosesi kimi müəyyən edilə bilər. Bütün hallarda mədəniyyət siyasətində əsas aparıcı rol dövlətimizə məxsusdur. Onun əsas məqsəd və vəzifələri tarixi və mədəni irsin qorunması, mədəniyyət və incəsənətin inkişafı, hamının mədəniyyətə bərabər çıxışını və mədəni fəaliyyətdə iştirakını təmin etmək, mədəniyyət sahəsində təhsilə dəstək göstərməkdir. Mədəni və tarixi irsin qorunması, yaradıcılığın himayə edilməsi, mədəniyyətin insan inkişafı amili kimi dərk edilməsi və qəbul olunmasının gücləndirilməsi dövlətimizin mədəniyyət siyasətinin əsasını təşkil edir. Bu yolda əsas aparıcı rollardan biri də Yeni Azərbaycan Partiyasının üzərinə düşür.
Ulu Öndər Heydər Əliyevin rəhbərliyi ilə təsis edilən partiyanın keçdiyi inkişaf yolu tariximizə qızıl hərflərlə yazılmışdır. Yeni Azərbaycan Partiyasının ötən illərdə qazanılmış uğurlarda, ölkəmizin tərəqqisində bu siyasi qurumun üzvü olan insanların əvəzsiz rolu vardır..
Bu gün Azərbaycan Respublikasında mədəniyyət siyasəti dedikdə, müxtəlif sosial institutlar tərəfindən işlənilən tədbirlər kompleksi nəzərdə tutulur. Bu isə öz növbəsində yaradıcı fəaliyyət göstərən mühitin formalaşmasını, yaradıcılıq sahəsində şərtlərin, sərhədlərin və prioritetlərin müəyyənləşdirilməsini, yaradılan mədəni dəyərlərin cəmiyyətin ixtiyarına verilməsini şərtləndirir. Azərbaycan mədəniyyətinin dövlət inkişaf proqramı və bu proqram çərçivəsində həyata keçirilən yüzlərlə layhələr milli mədəniyyətimizin idarəolunmasının yeni demokratik formalarının yaradılmasına geniş şərait yaratmışdır.
Yeni Azərbaycan Partiyası ölkəmizin siyasi, sosial-iqtisadi və mədəni həyatında aparıcı qüvvə kimi ölkədə milli-mənəvi dəyərlərin qorunması, zəngin mədəni irsin təbliği və mədəniyyət siyasətinin həyata keçirilməsində yaxından iştirak edir. Partiya mədəniyyət sahəsində islahatları, yaradıcı şəxslərə dəstəyi və beynəlxalq mədəni əlaqələri dövlətçilik maraqları çərçivəsində təşviq edir.
Azərbaycanın zəngin mədəni irsinin, dilinin və adət-ənənələrinin qorunub saxlanılması və gənc nəslə ötürülməsi, dövlətin mədəniyyət sahəsindəki proqramlarının və islahatlarının fəal təşviq edilməsi, yaradıcı ittifaqların, rəssamların, yazıçıların və digər mədəniyyət xadimlərinin fəaliyyətinə siyasi və mənəvi dəstək verilməsi, Azərbaycan mədəniyyətinin beynəlxalq aləmdə təbliği və mədəniyyətlərarası dialoqun gücləndirilməsi YAP-ın mədəniyyət sahəsindəki fəaliyyətinin əsas istiqamətləridir.Yeni Azərbaycan Partiyası milli mədəniyyətimizi ölkəmizin davamlı inkişafının və milli kimliyinin möhkəmlənməsinin vacib elementi kimi qəbul edir. Onu da qeyd edək ki, musiqi çox gözəl və güclü tərbiyə vasitəsidir. Ona görə də bütün təhsil pillələrində – istər məktəbəqədər müəssisələrdə, istər musiqi məktəblərində, istərsə də orta və ali məktəblərdə musiqi düzgün tədris olunmalıdır. Uşaq və gənclərə ümumi musiqi tərbiyəsi vermək, onları yüksək musiqi sənətinə cəlb etmək estetik zövq formalaşdırmaq, fəal bədii özfəaliyyət iştirakçılarını, musiqi-estetik biliklərin təbliğatçılarını tərbiyə etmək, böyüməkdə olan nəslin mənəviyyata dövrümüzün tələbləri ruhunda təkmilləşdirilməsinə kömək göstərmək musiqi-estetik tərbiyə işinin istiqamətləridir. Eyni zamanda, musiqi tədrisində əsas məqsəd şagirdlərdə yaradıcılıq qabiliyyətini üzə çıxartmaq, musiqi bacarıqlarını inkişaf etdirmək və formalaşdırmaq, keyfiyyətli musiqiyə qarşı maraq oyatmaqdər. Məktəblərdə musiqi təliminin əsas məqsədi milli və bəşəri sənət nümunələri əsasında şagirdlərdə musiqi mədəniyyətinin formalaşdırılması və inkişafını təmin etməkdən ibarətdir. Bu işdə Uşaq Musiqi Məktəblərinin rolu əvəzedilməzdir.
Musiqi və incəsənət məktəblərində müəllim keyfiyyəti də böyük əhəmiyyətə malikdir. Məhz onların sayəsində mədəniyyətin bütün sahələrində inkişafın, o cümlədən incəsənət təhsilinin təməli qoyulur, onlarda bilik və bacarıqlar inkişaf etdirilir. Musiqi təhsilinin mövcud vəziyyəti bu sahədə həyata keçirilən gündəlik işlərdən çox asılıdır. Uşaq İncəsənət və Musiqi məktəblərində tədrisin necə qurulması mədəniyyətimizin inkişafının təməlində dayanan mühüm məsələlərdəndir və bu sahədə keyfiyyətli təhsil başlıca meyardır. Musiqi və İncəsənət Məktəbləri hər zaman cəmiyyətimizin xüsusi diqqətində olub. Məktəblərin modernləşdirilməsi, onların maddi-texniki bazasının gücləndirilməsi, kadr potensialının möhkəmləndirilməsi, şagird hazırlığının keyfiyyətinə nəzarət mexanizmlərinin təkmilləşdirilməsi, qarşıda qoyulmuş əsas vəzifələrdir. Bununla bağlı Mədəniyyət Nazirliyi mütəmadi olaraq yeniliklərə imza atır, təhsilin məzmunca yeniləşməsinə can atır. Bu zaman Dövlətimiz, Mədəniyyət Nazirliyi və Yeni Azərbaycan Partiyası tərəfindən həyata keçirilən işlərin əhəmiyyətini xüsusi ilə vurğulamaq lazımdır. Biz hər işdə dövlətimizin yanındayıq və var gücümüzlə dövlətimizin yürütdüyü mədəniyyət siyasətini dəstəkləyirik.
Aynur Şixiyeva,
Gəncə şəhəri 4nömrəli Uşaq Musiqi Məktəbinin direktoru