Gəncə şəhərində görkəmli dövlət və elm xadimi, tanınmış həkim Əziz Əliyevin anadan olmasının 130 illik yubileyinə həsr olunmuş elmi-praktiki konfrans keçirilib.
Azərbaycan Respublikası Səhiyyə Nazirliyinin Əziz Əliyev adına Azərbaycan Dövlət Həkimləri Təkmilləşdirmə İnstitutu və Gəncə Şəhər İcra Hakimiyyətinin birgə təşkilatçılığı ilə keçirilən tədbir Fikrət Əmirov adına Gəncə Dövlət Filarmoniyasında baş tutub.
Əvvəlcə Əziz Əliyevin əziz xatirəsi ehtiramla yad edilib.
Çıxışlarda Əziz Əliyevin Azərbaycan səhiyyəsinin, tibb elminin və milli tibb təhsilinin inkişafındakı müstəsna xidmətləri vurğulanıb, onun zəngin elmi və ictimai irsinin əhəmiyyətindən bəhs olunub.
Gəncə Şəhər İcra Hakimiyyəti başçısının müavini Adil Tağıyev çıxışında bildirib ki, Əziz Əliyev səhiyyənin inkişafını yalnız tibb müəssisələrinin fəaliyyəti ilə məhdudlaşdırmayıb, yüksəkixtisaslı və peşəkar həkim kadrlarının hazırlanmasını da ölkənin gələcəyi baxımından mühüm strateji vəzifə kimi müəyyənləşdirib. Onun təşəbbüsləri və çoxşaxəli fəaliyyəti Azərbaycanda tibb təhsilinin və səhiyyə sisteminin inkişafında mühüm mərhələ təşkil edib.
Azərbaycan Dövlət Həkimləri Təkmilləşdirmə İnstitutunun rektoru, professor Nazim Pənahov çıxışında Əziz Əliyevin zəngin irsinin bu gün də tibb sahəsində çalışan mütəxəssislər üçün örnək olduğunu vurğulayıb. Qeyd edib ki, rəhbərlik etdiyi təhsil müəssisəsində həkimlərin bilik və bacarıqlarının artırılması, müasir tibbi nailiyyətlərin səhiyyə sistemində tətbiqi istiqamətində görülən işlər Əziz Əliyevin müəyyən etdiyi missiyanın davam etdirilməsinə xidmət edir.
Konfrans daha sonra elmi məruzələrlə davam edib. Məruzələrdə Əziz Əliyevin həyat və fəaliyyəti, Azərbaycan səhiyyəsinin və tibb elminin inkişafına verdiyi töhfələr, eləcə də elmi-pedaqoji irsi müxtəlif aspektlərdən təhlil olunub.
Qeyd olunub ki, Əziz Əliyevin 130 illik yubileyinin Gəncədə elmi-praktiki konfrans formatında qeyd edilməsi onun zəngin irsinin öyrənilməsi, təbliği və gələcək nəsillərə çatdırılması baxımından mühüm əhəmiyyət daşıyır.
