“Bu gün yalnız əzbərçilik və təkrarlama əsasında təhsil alan gənclərin müasir dövrün tələblərinə cavab verməsi çətin olacaq. Müəyyən testləri əzbərləməklə ali məktəbə qəbul olmaq, bakalavr və magistratura təhsili almaq, diplom əldə etmək mümkündür. Lakin əsas məsələ həmin şəxslərin dəyişən şəraitə uyğunlaşmaq, ünsiyyət qurmaq, tənqidi və yaradıcı düşünmə bacarıqlarına nə dərəcədə yiyələnməsidir”.
Etmtv.space xəbər verir ki, bu fikirləri UNESCO-nun Dinlərarası Dialoq və Mədəniyyətlərarası Anlaşma üzrə UNITWIN Şəbəkəsinin Akademik Forumu çərçivəsində keçirilən “Mədəniyyətlərarası dialoq, təhsil və rəqəmsal transformasiya” adlı panel sessiyasında elm və təhsil nazirinin müavini Firudin Qurbanov bildirib.
Onun sözlərinə görə, texnologiyaların sürətli inkişafı təhsil sisteminin qarşısında yeni vəzifələr qoyur:
“Gənclər müasir texnologiyalardan istifadə etməyi, dəyişikliklərə uyğunlaşmağı və effektiv ünsiyyət qurmağı bacarmalıdırlar. Onlarda tənqidi və yaradıcı təfəkkür formalaşdırılmalıdır. Xüsusilə yaradıcı düşünmə müasir dövrdə ən vacib bacarıqlardan biri hesab olunur”.
F.Qurbanov qeyd edib ki, süni intellektin və robotlaşdırılmış sistemlərin inkişafı gələcək əmək bazarında tələb olunan bacarıqları da dəyişəcək:
“Bu gün dördüncü texnoloji inqilabdan danışırıq. Qarşıda beşinci, altıncı texnoloji inqilablar da ola bilər. Gələcəkdə hansı bacarıqlara ehtiyac duyulacağını dəqiq bilmirik. Lakin təhsil sistemi gəncləri həmin dəyişikliklərə hazırlamalıdır”.