Tədbirdə Şuranın əhatə etdiyi Gəncə şəhəri, Göygöl, Daşkəsən, Gədəbəy, Samux, Şəmkir, Qazax, Ağstafa və Tovuz rayonlarında fəaliyyət göstərən dövlət qurumlarının nümayəndələri, eləcə də turizm sektoru ilə əlaqəli təşkilatların təmsilçiləri iştirak ediblər.
İclasda çıxış edən rayon icra hakimiyyəti başçılarının müavinləri Şuranın yaradılmasının Qərb regionunun sosial-iqtisadi inkişafına, yerli turizm potensialından səmərəli istifadəyə və əhalinin rifahının yüksəldilməsinə töhfə verəcəyini bildiriblər.
Dövlət Turizm Agentliyi sədrinin müşaviri, Regional Turizm Şurasının sədri Kənan Quluzadə Şuranın yaradılma məqsədləri, fəaliyyət istiqamətləri və hüquqi əsasları barədə məlumat verib. O, qurumlararası əməkdaşlığın gücləndirilməsinin, turizm sahəsində koordinasiyanın təkmilləşdirilməsinin və regionun turizm imkanlarının daha geniş tanıdılmasının əhəmiyyətini vurğulayıb.
Həmçinin “Azərbaycan Respublikasında turizmin inkişafına dair 2026–2030-cu illər üçün Dövlət Proqramı”nın əsas hədəfləri və regionların inkişafına dair “Təkliflər Planı”nda turizm sahəsi üzrə nəzərdə tutulan vəzifələr diqqətə çatdırılıb.
Dövlət Turizm Agentliyinin Mədəni irs və regional turizm şöbəsinin müdiri Elgün Cavadov, Azərbaycan Turizm Bürosunun Destinasiyaların inkişafı və turizm məhsulu departamentinin direktoru Heybət Vəliyev çıxışlarında regionun turizm potensialı, mövcud imkanlar və həyata keçirilən layihələr barədə məlumat veriblər.
İclasda Qərb regionunda turizm infrastrukturunun inkişafı, xidmət keyfiyyətinin yüksəldilməsi, yeni turizm məhsullarının yaradılması, mövcud marşrutların təkmilləşdirilməsi və yerli əhalinin turizm fəaliyyətinə cəlb olunması məsələləri müzakirə edilib. Eyni zamanda, dövlət qurumları, yerli icmalar və özəl sektor arasında əməkdaşlığın genişləndirilməsi, birgə layihələrin həyata keçirilməsi istiqamətində fikir mübadiləsi aparılıb.
Görüşün sonunda Şuranın növbəti mərhələdə həyata keçirəcəyi fəaliyyətlər üzrə prioritetlər müəyyənləşdirilib.
Qeyd edək ki, Regional Turizm Şuraları turizm sahəsində idarəetmənin səmərəliliyinin artırılması, yerli səviyyədə əlaqələndirmənin gücləndirilməsi və dövlət-özəl sektor əməkdaşlığının inkişafı məqsədilə yaradılıb. Gəncə Regional Turizm Şurasının fəaliyyəti Qərb regionunun turizm potensialının vahid yanaşma əsasında inkişafına xidmət edəcək.
