Gəncədə dahi Azərbaycan şairi və mütəfəkkiri Nizami Gəncəvinin 885 illik yubileyinə həsr olunmuş beynəlxalq elmi tədbirlər təşkil olunub.
AMEA-nın Gəncə Bölməsində “Azərbaycan və dünya nizamişünaslığının aktual problemləri” mövzusunda II Beynəlxalq elmi konfrans keçirilib. Azərbaycan Milli Elmlər Akademiyasının və Gəncə Şəhər İcra Hakimiyyətinin dəstəyi, AMEA-nın Gəncə Bölməsinin Nizami Gəncəvi Mərkəzinin, Azərbaycanın Türkiyə və Özbəkistandakı səfirlikləri nəzdindəki mədəniyyət mərkəzlərinin birgə təşkilatçılığı ilə baş tutan konfransda Azərbaycan, Türkiyə, Özbəkistan, İran, Livan, Hindistan, Litva, Pakistan, Almaniya və Rusiyanın Kalmıkiya Respublikasından alim və tədqiqatçılar iştirak ediblər.
Konfransdan əvvəl iştirakçılar Ümummilli Lider Heydər Əliyevin Gəncənin mərkəzində ucaldılmış abidəsini ziyarət edərək önünə gül dəstələri qoyub, xatirəsinə ehtiramlarını bildiriblər.
Tədbirin açılışında AMEA-nın Rəyasət Heyətinin üzvü, Gəncə Bölməsinin sədri, akademik Fuad Əliyevin və Gəncə Şəhər İcra Hakimiyyəti başçısı Aparatının sektor müdiri Yadigar Bədəlovun çıxışları dinlənilib. Daha sonra AMEA-nın Gəncə Bölməsinin elmi işlər və rəqəmsal inkişaf üzrə sədr müavini, filologiya üzrə fəlsəfə doktoru, dosent Əlimuxtar Muxtarovun moderatorluğu ilə konfransın plenar iclası keçirilib.
Plenar iclasda Nizami Gəncəvinin yaradıcılığı, fəlsəfi irsi, dünya ədəbiyyatına təsiri, multikultural dəyərlər və müasir nizamişünaslığın tədqiqat istiqamətləri müzakirə olunub. Məruzələr səkkiz bölmə üzrə dinlənilib. Tədbirə qəbul edilmiş 251 elmi məqalə ümumilikdə 1250 səhifə olmaqla dörd cilddə nəşr edilib.
Bununla yanaşı, Nizami Gəncəvi Muzeyində “Nizami Gəncəvi və bəşəri dəyərlər: Mədəniyyətlərarası dialoq və ortaq irs” mövzusunda beynəlxalq simpozium təşkil olunub.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin, Gəncə Şəhər İcra Hakimiyyətinin və Gəncə-Daşkəsən Regional Mədəniyyət İdarəsinin dəstəyi, Nizami Gəncəvi Muzeyi ilə AMEA-nın Gəncə Bölməsinin Nizami Gəncəvi Mərkəzinin birgə təşkilatçılığı, Gəncə Dövlət Tarix-Mədəniyyət Qoruğunun, GDU-nun nəzdində Regional Kollecinin və “Etno Miras” Araşdırma və Tədqiqat Mərkəzinin tərəfdaşlığı ilə keçirilən simpoziumda müxtəlif ölkələri təmsil edən nizamişünas-alimlər, professorlar, tədqiqatçılar və mədəniyyət xadimləri iştirak ediblər.
Simpoziumda Nizami Gəncəvinin ədəbi-fəlsəfi irsi, yaradıcılığında əksini tapan ümumbəşəri dəyərlər, dünya ədəbiyyatına və mədəniyyətinə verdiyi töhfələr, eləcə də mədəniyyətlərarası dialoqun inkişafında irsinin rolu ətrafında fikir mübadiləsi aparılıb.
Beynəlxalq tədbirlər dahi şairin irsinin beynəlxalq miqyasda təbliği, nizamişünaslıq sahəsində elmi əlaqələrin genişləndirilməsi, Azərbaycanın zəngin ədəbi-mədəni ənənələrinin tanıdılması və mədəni əməkdaşlığın inkişafına xidmət edib.
