Onunla ilk tanışlığım mənim uşaqlıq illərimə təsadüf edir. Yazıçı Cəmil Əlibəyovun “Qış macərası” povestinin motivləri əsasında 1983-cü ildə Mərkəzi televiziyanın (Moskva) sifarişi ilə çəkilmiş ssenari müəllifi Pavel Finn, quruluşçu rejissoru isə Yuli Qusman olan “İlıq dənizdə biz parçası” filminin çəkiliş meydançasından. Anam, Respublikanın Xalq artisti Sədayə xanım Mustafayeva da bu filmdə əsas obrazlardan biri olan Təqaüdcünün anası obrazına çəkilirdi. Rasim Balayev isə Məmməd obrazında idi.
Sonradan 1991-ci ildə Azərbaycan Dövlət Mədəniyyət və İncəsənət Universitetinə qəbul olduğum ildən başlayaraq bu tanışlıq auditoriyadan və eləcə də Kinomotoqrafçılar İttifaqından daha sıx şəkildə davam etdi. Təvazökar və səmimi söhbətləri ilə hər zaman yanımızda olan Rasim Babayev Universitet illərində bizim ən əziz dostumuza çevrilə bilmişdi. Onun sənət söhbətlərindən doymaq olmurdu. Sənət məziyyətləri ilə cilalanmış ustad dərsləri hər zaman böyük sevgimiz ilə qarşılanırdı.
Bu gün bu böyük sənətkarı son mənzilə yola saldıq. Ancaq düşünürəm ki, Rasim Balayev dünyasını dəyişməklə bu fani dünyada öz missiyasını başa vuraraq başqa bir dünyaya növbəti missiyanı həyata keçirmək üçün köç etmiş oldu.
Ruhun şad, məkanın cənnət olsun dəyərli və əziz sənətkar !!!
Anar Burcəliyev,
teatrşünas-tənqidçi