“Son illər peşə təhsili üzrə müsbətə doğru dəyişikliyi müşahidə edirik. Həm peşə təhsilində dual təhsil, həm subbakalavr dərəcəsinin verilməsi istiqamətində vətəndaşların marağını artırıb”.
Bunu jurnalistlərə açıqlamasında elm və təhsil məsələləri üzrə mütəxəssis Elçin Əfəndi bildirib.
“Sonuncu dəfə cənab prezident tərəfindən peşə təhsili müəssisələrinin yaradılması ilə bağlı və əvvəlki peşə təhsili müəssisələrinin yenidən qurulması ilə bağlı xüsusi sərəncam, tapşırıq verilib. Bundan irəli gələrək də biz müxtəlif regionlarda peşə təhsili müəssisələrinin yaradılmasını nəzərdə tuturuq. Xüsusilə də işğaldan azad olunmuş ərazilərdə. Təbii ki, bura həm Ağdam, həm Qubadlı, Kəlbəcər, Şuşa şəhəri, o cümlədən Cəbrayıl rayonu və digər ərazilər daxildir ki, bu istiqamətdə, yəni həmin bölgələrdə peşə təhsili müəssisələri tikilib istifadəyə verilsin”, – deyə o qeyd edib.
Ekspertin fikrincə, paralel istiqamətdə respublikanın bəzi məntəqələrində peşə təhsili müəssisələri yaradılmalıdır:
“Məsələn, Ağsu rayonu, o cümlədən şimal rayonlarından bəzilərində, Siyəzən, o cümlədən Zaqatala istiqamətində, həmçinin Goranboy, Gədəbəy — bu istiqamətlərdə peşə təhsili müəssisələrini mütləq istifadəyə verməliyik ki, orada yaşayan vətəndaşlarımız üçün gələcək məşğulluq istiqaməti formalaşsın, o cümlədən də həmin ərazilərdə təhsil almaq istəyən vətəndaşlar üçün ən azı peşə təhsilinin əlçatanlığını təmin etmiş olaq”.