Azərbaycan Dövlət İqtisad Universitetinin (UNEC) Beynəlxalq əlaqələr departamentinin Xarici əlaqələr şöbəsinin müdiri, Gəncə Dövlət Universitetinin doktorantı Rəsul Yusibov Macarıstanda keçirilən beynəlxalq elmi konfransda iştirak edib.
O, Obuda Universitetinin Keleti Karoly Biznes və İdarəetmə Fakültəsi tərəfindən hər il təşkil olunan “MEB24 International Conference on Management, Enterprise and Benchmarking” beynəlxalq konfransının final sessiyasında “Green Growth Transformation and Entrepreneurial Ecosystem Development in Post-Conflict Karabakh: Drivers, Mechanisms, and Policy Implications” mövzusunda təqdimatla çıxış edib.
Gənc tədqiqatçı çıxışında Qarabağ regionunun post-münaqişə dövründə yaşıl iqtisadi artım modelinə keçid imkanlarından bəhs edib. Təqdimatda innovasiya yönümlü sahibkarlıq ekosisteminin formalaşdırılması, eləcə də dayanıqlı inkişafın təmin olunmasında institusional və iqtisadi mexanizmlərin rolu ətraflı şəkildə təhlil olunub.
Tədqiqatın əsas elmi əhəmiyyəti Qarabağın yenidən qurulması prosesinin yalnız iqtisadi bərpa deyil, həm də ekoloji dayanıqlılıq və innovativ inkişaf kontekstində qiymətləndirilməsi ilə bağlıdır. Bu yanaşmanın regionun uzunmüddətli dayanıqlığı üçün inteqrasiya olunmuş inkişaf modelinin formalaşdırılmasına töhfə verdiyi vurğulanıb.
Konfransda 20-dən çox xarici universitetin nümayəndələri, professor və tədqiqatçılar iştirak edib, müxtəlif ölkələrdən olan alimlər arasında geniş elmi müzakirələr aparılıb.
Rəsul Yusibovun təqdimatı iştirakçılar tərəfindən maraqla qarşılanıb, mövzu ətrafında suallar ünvanlanıb və fəal fikir mübadiləsi aparılıb.
Sonda çıxışın elmi aktuallığı və praktik əhəmiyyəti xüsusilə qeyd olunub.
