Gəncə-Daşkəsən Regional Təhsil İdarəsində struktur bölmələrin fəaliyyətinin qiymətləndirilməsi və işin daha da təkmilləşdirilməsi məqsədilə hesabat görüşlərinə start verilib. Görüşlər çərçivəsində İnzibati təşkilat və Tədrisin keyfiyyəti sektorunun əməkdaşlarının son bir il ərzində həyata keçirdikləri fəaliyyətlərə dair hesabatları dinlənilir.
Hesabat təqdimatlarında sektor əməkdaşları tərəfindən ötən dövr ərzində görülmüş işlər, əldə olunan nəticələr, qarşıya çıxan çətinliklər və növbəti mərhələ üçün nəzərdə tutulan hədəflər ətraflı şəkildə təqdim olunur.
Hesabat görüşləri Gəncə-Daşkəsən Regional Təhsil İdarəsinin müdiri Elçin Kərimov, müdir müavini Elmin Məmmədtağıyev və idarənin digər əməkdaşlarının iştirakı ilə keçirilir.
Görüş zamanı çıxış edən idarə müdiri Elçin Kərimov təqdim olunan hesabatları müsbət dəyərləndirərək əməkdaşların fəaliyyətində irəliləyişin aydın şəkildə hiss olunduğunu qeyd edib. Bununla yanaşı, o, mövcud çatışmazlıqların aradan qaldırılması istiqamətində konkret göstərişlər verib və qarşıdakı dövrdə fəaliyyətin daha səmərəli qurulması üçün müvafiq tövsiyələrini səsləndirib.
Sonda bildirilib ki, bu cür hesabat görüşlərinin keçirilməsi idarədaxili koordinasiyanın gücləndirilməsinə, fəaliyyətin təhlilinə və strateji hədəflərin daha effektiv şəkildə reallaşdırılmasına mühüm töhfə verir.
