Azərbaycan Dövlət Aqrar Universitetində (ADAU) 2025/2026-cı tədris ilinin məzunlarına həsr olunan “Məzun günü” təntənəli şəkildə qeyd edilib.
Gəncə İdman Sarayında təşkil olunan tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Milli Məclisin deputatları Məlahət İbrahimqızı və Pərvin Kərimzadə, kənd təsərrüfatı nazirinin müavini Seymur Səfərli, ADAU-nun rektoru Zəfər Qurbanov, Qərbi Azərbaycan İcması İdarə Heyətinin üzvü, Azərbaycan Dövlət Pedaqoji Universitetinin prorektoru, professor Mahirə Nağıyeva, professor-müəllim heyəti, tələbələr, məzunlar və onların valideynləri iştirak ediblər.
Tədbir Ümummilli Lider Heydər Əliyevin və şəhidlərin əziz xatirəsinin bir dəqiqəlik sükutla yad olunması ilə başlayıb. Daha sonra Azərbaycan Respublikasının Dövlət Himni səsləndirilib.
Niyazi Bayramov çıxışında məzunları təbrik edərək bildirib ki, bilikli, vətənpərvər və məsuliyyətli gənclərin yetişməsi ölkənin davamlı inkişafının əsas təminatlarından biridir. Şəhər rəhbəri məzunlara gələcək fəaliyyətlərində uğurlar arzulayıb, onların əldə etdikləri bilik və təcrübəni Azərbaycanın inkişafı naminə uğurla tətbiq edəcəklərinə əminliyini ifadə edib.
Zəfər Qurbanov çıxış edərək məzunları təbrik edib, onlara gələcək həyat və fəaliyyətlərində uğurlar arzulayıb. O bildirib ki, universitetdən məzun olmaq yalnız bir təhsil mərhələsinin başa çatması deyil, eyni zamanda cəmiyyət və dövlət qarşısında yeni məsuliyyətlərin başlanğıcıdır. Rektor universitetdə əldə olunan bilik və bacarıqların məzunların peşəkar fəaliyyətində mühüm rol oynayacağına əminliyini ifadə edib, gənclərin ölkənin aqrar sektorunun inkişafına, ərzaq təhlükəsizliyinin təmin olunmasına və Azərbaycanın gələcək tərəqqisinə layiqli töhfələr verəcəklərinə inandığını vurğulayıb.
Seymur Səfərli aqrar sahənin ölkə iqtisadiyyatında strateji əhəmiyyət daşıdığını qeyd edərək, ADAU məzunlarının müasir aqrar sektorun inkişafında mühüm rol oynayacaqlarını vurğulayıb, onlara peşə fəaliyyətlərində yeni uğurlar arzulayıb.
Tədbirdə çıxış edən digər natiqlər məzunları təbrik edərək onlara gələcək həyat və fəaliyyətlərində uğurlar arzulayıblar. Çıxışlarda ADAU-nun ölkənin aqrar sahəsi üçün yüksəkixtisaslı kadrların hazırlanmasında mühüm rol oynadığı qeyd edilib.
Daha sonra universiteti ən yüksək göstəricilərlə başa vuran məzunlar çıxış ediblər. Aqrar İqtisadiyyat fakültəsinin “Marketinq” ixtisası üzrə məzunu İsmayıl İbrahimov və Baytarlıq təbabəti fakültəsinin “Əczaçılıq” ixtisası üzrə məzunu Şule Özmen Mustafa tələbəlik illərində qazandıqları bilik və təcrübənin gələcək peşə fəaliyyətlərində mühüm rol oynayacağını bildirərək, göstərilən diqqət və qayğıya görə universitet rəhbərliyinə və professor-müəllim heyətinə minnətdarlıqlarını ifadə ediblər.
Tədbirin davamında hər bir fakültə üzrə universiteti ən yüksək orta müvəffəqiyyət göstəricisi ilə bitirən məzunlara təşəkkürnamələr və qiymətli hədiyyələr təqdim olunub. Azərbaycan Dövlət Aqrar Universitetini ən yüksək orta bal göstəricisi ilə başa vuran məzunun adı isə ənənəyə uyğun olaraq universitetin Fəxri Kötüyünə həkk edilib.
Rəsmi hissədən sonra tədbir konsert proqramı ilə davam edib.
