Dövlət İmtahan Mərkəzi tərəfindən 150 ballıq ixtisasların sayının artırılması ilə bağlı verilən məlumat subbakalavrlar arasında etirazla qarşılanıb. Qeyd olunur ki, 150 ballıq ixtisaslar artırıldığı üçün subbakalavrların qəbulu üçün artıq yer qalmayacaq. Ekspertlər isə bildirirlər ki, bu, kolleclərdə yerlərin boş qalmasına səbəb olacaq. Çünki bir sıra şəxslər sonradan universitetdə təhsil almaq imkanı əldə etmək üçün kollecləri seçirlər.
Subbakalavrların şansı həqiqətənmi azalıb?
Redaktor.az-a danışan təhsil eksperti Məzahir Məmmədli Azərbaycanda kollecə daxil olan tələbələrin hər birinin bunun onlar üçün bir tramplin olduğunu və gələcəkdə mütləq imtahansız hansısa bir ali təhsil müəssisəsinə qəbul ola biləcəklərlərini düşündüyünü bildirib:
“Amma artıq bir neçə ildir qəbuldan kənarda qalan tələbələr var idi, amma bu il ümumiyyətlə onların şansı çox az qiymətləndirilir. Dövlət İmtahan Mərkəzinin sədri Məleykə Abbaszadə tərəfindən 150 ballıq yeni ixtisasların siyahısı da açıqlanıb. Açıqlamadan sonra birinci və ikinci qruplar üçün bir şansı olan subbakalavrın demək olar ki, şansı sıfıra yaxınlaşıb. 2027–2028-ci tədris ilində ümumiyyətlə kollecləri yəqin ki, çox az sayda adam seçəcək.
Bu, ancaq onunla əlaqədardır ki, ümumi ortalama balını kolleclərdə yüksək etməklə müəyyən ali təhsil müəssisələrində təhsil almaq imkanları yaranırdı. Eyni zamanda, bundan əvvəl də ali təhsil müəssisələri subbakalavrlarla bağlı etirazlarını səsləndirmişdilər. Azərbaycan Dövlət Neft və Sənaye Universiteti və Texniki Universitet birmənalı olaraq 2024–2025-ci tədris ilindən etiraz etməyə başlamışdılar ki, biz subbakalavrları qəbul etmirik. Çünki onlar artıq tədris müddətində kifayət qədər digər tələbələrdən geri qalırlar və ayaqlaşa bilmirlər”.
Onun sözlərinə görə, bu məsələlərdə müəyyən qədər düşünməyə ehtiyac var:
“Mən keçən dəfə də təklif etmişdim ki, subbakalavrlar ali təhsil müəssisələrinin nəzdində bir dərəcə, səviyyə olmalıdır. Yəni subbakalavr, bakalavr, magistratura və doktorantura səviyyələri kimi. Artıq Azərbaycanda kolleclərin çoxu onsuz da ali təhsil müəssisələrinin nəzdindədir. Elə yaxşı olar ki, bunları bir pillə kimi qeyd etmək, ali təhsil müəssisələri ona ciddi nəzarət edə bilsinlər”.-ekspert bildirib.