İqor Sergeyenko və rəhbərlik etdiyi nümayəndə heyəti Gəncə Avtomobil Zavodunda olublar.
Görüşdə Gəncə Şəhər İcra Hakimiyyətinin başçısı Niyazi Bayramov, Belarus Respublikasının Azərbaycandakı səfiri Dmitri Pineviç, Gəncə Avtomobil Zavodu İstehsalat Birliyinin Müşahidə Şurasının sədri, Milli Məclisin deputatı Xanlar Fətiyev, Birliyin direktoru Amin Əliyev, Minsk Avtomobil Zavodu (MAZ) və Minsk Traktor Zavodunun (MTZ) rəhbər nümayəndələri və digər məsul şəxslər iştirak ediblər.
Səfər çərçivəsində qonaqlar əvvəlcə Gəncə Avtomobil Zavodu İstehsalat Birliyinin balansında olan 240 yerlik körpələr evi-uşaq bağçası ilə tanış olublar. Bildirilib ki, 1989-cu ildə inşa edilən və 2016-cı ildə Heydər Əliyev Fondunun dəstəyi ilə əsaslı təmir olunan binanın ümumi sahəsi 13 min kvadratmetrdən artıqdır. Bağçanın ərazisi hasarlanıb, burada yaşıllıq zolağı salınıb, uşaqların asudə vaxtının səmərəli təşkili üçün yay çardaqları, əyləncə və oyun avadanlıqları quraşdırılıb. Bina su anbarı, qazanxana və müasir istilik sistemi ilə təchiz olunub.
Daha sonra nümayəndə heyəti zavodun istehsal sahələri və yığım xətləri ilə tanış olub. Xanlar Fətiyev qonaqlara müəssisənin fəaliyyəti, istehsal imkanları və Belarus müəssisələri ilə əməkdaşlıq əlaqələri barədə məlumat verib.
Qeyd olunub ki, 2006-cı ildə Azərbaycan Respublikasının Prezidenti İlham Əliyevin Belarus Respublikasına rəsmi səfəri zamanı imzalanmış ikitərəfli əməkdaşlıq sənədlərindən sonra Gəncə Avtomobil Zavodu İstehsalat Birliyi ilə Minsk Traktor Zavodu, Minsk Avtomobil Zavodu və digər Belarus müəssisələri arasında uzunmüddətli və səmərəli əməkdaşlıq əlaqələri formalaşıb.
Müəssisəyə baxış zamanı qonaqlar Azərbaycan-Belarus əməkdaşlığı çərçivəsində istehsal olunan kommunal təyinatlı avtomobillərin yığım prosesi ilə yaxından tanış olublar. Bildirilib ki, həmin avtomobillərə quraşdırılan konteyner hissələri 100 faiz yerli istehsaldır. İndiyədək 120 kommunal avtomobil yığılıb. Cari il noyabrın 15-dək daha 50 avtomobilin yığılaraq müvafiq sifarişçilərə təhvil verilməsi nəzərdə tutulur.
İkitərəfli görüşdə Azərbaycan-Belarus iqtisadi əməkdaşlığının prioritet istiqamətlərindən biri olan Gəncə Avtomobil Zavodu İstehsalat Birliyi ilə MTZ, MAZ və digər Belarus müəssisələri arasında əlaqələrin gələcək inkişaf perspektivləri müzakirə edilib.
Vurğulanıb ki, təxminən 20 illik əməkdaşlıq dövründə Gəncə Avtomobil Zavodunda 16 minə yaxın kənd təsərrüfatı texnikası, 5 mindən çox avtomobil və digər texnikalar yığılıb. Bu əməkdaşlıq Azərbaycan və Belarus arasında sənaye və istehsal sahələrində əlaqələrin genişlənməsinə mühüm töhfə verib.
İqor Sergeyenko Gəncə Avtomobil Zavodunun Azərbaycan-Belarus iqtisadi əməkdaşlığında mühüm rol oynadığını vurğulayıb.
Görüş zamanı tərəflər ikitərəfli əməkdaşlığın gələcək inkişaf perspektivləri, mövcud əlaqələrin genişləndirilməsi və yeni birgə layihələrin həyata keçirilməsi imkanları ətrafında fikir mübadiləsi aparıblar.