Görkəmli teatrşünas – tənqidçi Anar Ərtoğrul Burcəliyevin qələmə aldığı “Gəncənin Xan çinarı – Altay Məmmədov” elmi monoqrafiya Azərbaycan ədəbiyyatının və teatr sənətinin görkəmli nümayəndələrindən biri olan Altay Məmmədovun yaradıcılıq irsinin ədəbiyyatşünaslıq və teatrşünaslıq kontekstində araşdırılmasına həsr olunmuş yeni tədqiqat əsəridir.
Monoqrafiyada yazıçının bədii yaradıcılığı, dramaturji irsi, ədəbi-estetik görüşləri və teatr sənəti ilə bağlı fəaliyyəti sistemli şəkildə təhlil edilir. Tədqiqatda Altay Məmmədovun əsərlərinin janr, mövzu, ideya, obraz və poetik xüsusiyyətləri ilə yanaşı, dramaturgiyasının səhnə təcəssümü, rejissor və aktyor yozumları, teatr-estetik xüsusiyyətləri də elmi-nəzəri baxımdan araşdırılır.
Monoqrafiya Altay Məmmədov yaradıcılığının bütöv şəkildə öyrənilməsinə, onun ədəbiyyat və teatr tarixindəki mövqeyinin müəyyənləşdirilməsinə, eləcə də müasir ədəbiyyatşünaslıq və teatrşünaslıq üçün aktual elmi qənaətlərin formalaşdırılmasına xidmət edir.
Əsər ədəbiyyatşünaslar, teatrşünaslar, tədqiqatçılar, ali məktəb müəllimləri və tələbələr üçün elmi mənbə kimi əhəmiyyət daşıyır.
Qeyd edək ki, kitabın elmi redaktoru, fəlsəfə doktoru İmran Axundov, redaktorları Sailə Məhərrəmqızı, Vaqif Əmiraslan, ön sözün müəllifi isə fəlsəfə doktoru, Elm üzrə Prezident mükafatçısı Elnur Həsənovdur.