Müstəqil Azərbaycan Respublikasının Konstitusiyası ölkəmizdə demokratik, hüquqi, dünyəvi dövlət quruculuğu prosesinə hüquqi baza yaratdı və onun inkişafına güclü təkan verdi, hakimiyyət bölgüsünün əsas prinsiplərini müəyyənləşdirdi. İnsan və vətəndaş hüquqlarının, azadlıqlarının müdafiəsini qanunvericilik, icra və məhkəmə hakimiyyəti orqanları üzərinə ümdə vəzifə olaraq qoydu.
Əsas Qanunda dövlətin müstəqilliyini, suverenliyini və ərazi bütövlüyünü qorumaq, cəmiyyətin demokratikləşdirilməsinə və vətəndaş cəmiyyətinin bərqərar olmasına nail olmaq, qanunların aliliyini təmin edən hüquqi, dünyəvi dövlət qurmaq, bazar iqtisadiyyatına xas olan münasibətlərin formalaşmasını təmin etmək kimi nailiyyətlər təsbit olunmuşdur.
5 bölmə, 12 fəsil, 158 maddədən ibarət Konstitusiyada insan hüquq və azadlıqlarına geniş yer verilməsi ölkəmizin demokratiya ideallarına sadiqliyinin göstəricisidir.
Belə bir gündə biz də öz Konstitusiya hüquqlarımızdan istifadə etmək qərarına gəldik. Elm və Təhsil Nazirliyi yanında Peşə Təhsili üzrə Dövlət Agentliyinin direktoru İlqar Bayramlıya Etmtv.space təhsil portalı adından rəsmi məktub ünvanladıq. Ümid edirik ki, məktubumuza və istəyimizə hörmətlə yanaşılacaq, portalın qaldırdığı məsələ öz müsbət həllini tapacaqdır.
Məktub-müraciətdə deyilir:
Elm və Təhsil Nazirliyi yanında Peşə Təhsili üzrə Dövlət Agentliyinin direktoru İlqar Bayramlıya
Müraciət
Hörmətli İlqar müəllim!
Yazıb sizə bildiririk ki, Etmtv.space təhsil portalının Peşə Təhsili üzrə DövlətAgentliyinin nəzdində fəaliyyət göstərən Sənaye və Texnologiyalar üzrə Gəncə Dövlət Peşə Təhsili Mərkəzinin direktoru Elmir Cəfərova və Gəncə şəhər Ticarət və Xidmət üzrə Gəncə Dövlət Peşə Təhsil Mərkəzinin direktoru Azər Rüstəmova ünvanladığı 5 avqust 2026-cı il tarixli məktuba hələ də bir cavab almamışıq. Məktubda bizi maraqlandıran sorğulara cavab verilmə tarixi artıq aylardır ki, bitmişdir və sorğuda sadalanan məsələlərə münasibət bildirilməmişdir. Buna dəfələrlə cəhd etsək də adı çəkilən direktorlar müxtəlif bəhanələrlə bundan yayınmışlar. Əlbəttə ki, həmin dövrdə sualların şifahi olaraq da cavablandırılması yetərdi. Lakin, edilmədi. Bizə və işimizə olan bu aşağılayıcı və təhqiramiz yanaşma bizi aylar sonra da ağır təsir etməkdədir. Onlarla yaxından tanışlığımız və münasibətlərimiz olmuşdur. Bununla belə təhsil portalına belə münasibət dözülməzdir və bu səbəbdən məhz sizə müraciət etməyi qərara almışıq. Ümid edirik ki, onların jurnalistlərə belə həqarətli yanaşmasını nəzərə alaraq onlar tərəfindən suallarımızın cavablandırmasına şərait yaradılmasına kömək edəcəksiniz.
Əgər onların dövlətdən və ictimaiyyətdən gizlədiləsi bir işləri yoxsa, suallarımıza cavab vermələri xahiş olunur.
Onlara ünvanladığımız məktubların surətini müraciətimizə əlavə edirik:
Hörmətlə: Ruhulla Zahidov, yazıçı-jurnalist,
Etmtv. space təhsil portalının təsisçisi və baş redaktoru.
Mənim fikrimcə, jurnalist sorğusuna cavab vermək dövlət qurumlarının və vəzifəli şəxslərin qanuni öhdəliyidir. Jurnalistin ünvanladığı rəsmi sorğunu cavabsız qoymaq, müxtəlif bəhanələrlə cavab verməkdən yayınmaq yolverilməzdir.
Jurnalist sorğusu şəxsi xahiş deyil, ictimaiyyətin məlumat almaq hüququnun təmin olunması vasitəsidir. Hər hansı məlumatın açıqlanmasına qanunla məhdudiyyət qoyulmayıbsa, aidiyyəti qurum suallara qanunla müəyyən edilmiş müddətdə cavab verməlidir.