Gəncə Şəhər İcra Hakimiyyətinin başçısı Niyazi Bayramov tərəfindən 8 Noyabr – Zəfər Günü ilə əlaqədar təsdiq edilmiş Tədbirlər Planına uyğun olaraq, Azərbaycan Dövlət Aqrar Universitetində, Gəncə Dövlət Universitetində və Azərbaycan Texnologiya Universitetində Zəfər Gününə həsr olunmuş tədbirlər keçirilib.
Tədbirlərdə Gəncə Şəhər İcra Hakimiyyətinin, YAP Gəncə şəhər təşkilatının rəsmi nümayəndələri, millət vəkilləri, universitetlərin rektorları, şəhid ailələrinin üzvləri, müharibə iştirakçıları, professor-müəllim heyəti və tələbələr iştirak ediblər.
Əvvəlcə Ulu Öndər Heydər Əliyevin və Vətənimizin azadlığı, ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib, ardınca Azərbaycan Respublikasının Dövlət Himni səsləndirilib.
Çıxışlarda 44 günlük Vətən müharibəsində Azərbaycan Ordusunun qazandığı tarixi Qələbənin əhəmiyyətindən, xalqımızın nümayiş etdirdiyi milli birlik və həmrəylikdən bəhs olunub. Qeyd edilib ki, Müzəffər Ali Baş Komandan, Prezident İlham Əliyevin rəhbərliyi ilə əldə edilən Zəfər Azərbaycanın hərb tarixinə qızıl hərflərlə yazılmaqla yanaşı, xalqımızın əyilməz iradəsinin, qəhrəmanlığının və Vətən sevgisinin təntənəsidir.
Bildirilib ki, Zəfər Günü şəhidlərimizin qanı, qazilərimizin fədakarlığı və Azərbaycan xalqının birliyi hesabına qazanılmış tarixi nailiyyətin təcəssümüdür. Bu möhtəşəm Qələbənin gənc nəsildə vətənpərvərlik ruhunun yüksəldilməsi, milli-mənəvi dəyərlərə bağlılığın gücləndirilməsi baxımından xüsusi əhəmiyyət daşıdığı vurğulanıb.
Tədbirlər tələbələrin hazırladıqları konsert proqramları ilə davam edib.
