Gəncə Şəhər İcra Hakimiyyəti və Gəncə Şəhər Birləşmiş Xəstəxanasının (ŞBX) birgə təşkilatçılığı ilə erkən yaşda hamiləliyin yarada biləcəyi fəsadlar və tibb müəssisəsindən kənarda baş verən doğuşların qarşısının alınması mövzusunda maarifləndirici tədbir keçirilib.
Tədbirdə Gəncə Şəhər İcra Hakimiyyəti başçısı Aparatının Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektorunun aparıcı məsləhətçisi – Uşaq hüquqlarının müdafiəsi üzrə komissiyanın məsləhətçi-psixoloqu Nuriyə Məmməd-zadə, Gəncə ŞBX-nin İlkin Səhiyyə Xidmətinin rəhbəri Ruhəngiz Əliyeva, Perinatal Mərkəzin rəhbəri, həkim mama-ginekoloq Sevda Büniat-zadə, M. Abbaszadə Ailə Sağlamlıq Mərkəzinin ailə həkimi-ginekoloqu Gülnarə Həsənova, Kəpəz Ailə Sağlamlıq Mərkəzinin ailə həkimi-ginekoloqu Mehparə Şirinova və digər aidiyyəti şəxslər iştirak ediblər.
Tədbirdə erkən yaşda hamiləliyin ana və uşaq sağlamlığı üçün yarada biləcəyi risklər, reproduktiv sağlamlığın qorunması, planlı hamiləliyin və müntəzəm tibbi nəzarətin əhəmiyyəti, eləcə də doğuşların tibb müəssisələrində həyata keçirilməsinin vacibliyi barədə məlumat verilib. Bildirilib ki, vaxtında tibbi müdaxilə və ilkin səhiyyə xidmətlərindən düzgün istifadə mümkün fəsadların qarşısının alınmasında mühüm rol oynayır.
Həmçinin erkən yaşda hamiləliyin bioloji fəsadları ilə yanaşı, psixoloji və sosial təsirləri barədə fikir mübadiləsi aparılıb, qadınların reproduktiv sağlamlığı ilə bağlı maarifləndirmə işlərinin gücləndirilməsinin vacibliyi vurğulanıb.
Sonda Azərbaycan Respublikası Prezidentinin 15 iyul 2026-cı il tarixli 1100 nömrəli Sərəncamı ilə təsdiq edilmiş “Azərbaycan Respublikasında insan alverinə qarşı mübarizəyə dair 2026–2030-cu illər üçün Milli Fəaliyyət Planı”ndan irəli gələn vəzifələr diqqətə çatdırılıb. Xüsusilə tibb müəssisəsindən kənarda baş verən doğuş faktlarına nəzarətin gücləndirilməsi istiqamətində aidiyyəti qurumların qarşılıqlı əməkdaşlığının əhəmiyyəti qeyd olunub və bu istiqamətdə qarşıda duran vəzifələr müzakirə edilib.
