“Məktəb bufetlərinin, hətta ali təhsil müəssisələrində bufetlərin, həyətdə kiçik kafelərin fəaliyyət göstərməsinin birbaşa Qida Təhlükəsizliyi Agentliyi ilə əlaqəsi var. Artıq Qida Təhlükəsizliyi Agentliyinin lisenziya vermədiyi və yaxud da onun yoxlamalarından düzgün keçməyən məktəb bufetlərinin fəaliyyət göstərmələrinə müəyyən razılıq olmalıdır. Ümumi təhsil məktəblərində ancaq təmizliyə və müəyyən iş qrafikinə məktəb rəhbərlikləri təsir edə bilir. Qalan məsələlərə – qidalanma rasionuna, o icazələrin alınmasına artıq birbaşa Qida Təhlükəsizliyi Agentliyi tərəfindən göstərişlər verilir”.
Bu sözləri Redaktor.az-a açıqlamasında təhsil eksperti Məzahir Məmmədli məktəblərdə fəaliyyət göstərən bufetlərdən danışarkən bildirdi.
Onun sözlərinə görə, bufetlərlə bağlı xüsusi kampaniya da aparılıb:
“Qida Təhlükəsizliyi Agentliyinin bir neçə məktəbdə ötən il apardığı yoxlamaların nəticəsinə görə müvəqqəti fəaliyyətini dayandırdığı məktəb bufetləri də olmuşdu. Əlbəttə, indi artıq özəl məktəblərdə bu, yüksək standartlara uyğun qurulub, orada günorta qidalanması ilə bağlı rasionlar müəyyən olunub. Amma dövlət ümumi təhsil məktəblərində isə bu məsələ bir qədər iki pilləlidir. Yəni bir tərəfdən məktəbdən kənar idarə olunur deyə, məktəb rəhbərliyi hər dəfə bu məsələlərlə bağlı məsuliyyət daşımadığını bildirir. Amma bir zəhərlənmə və yaxud da bir xoşagəlməz hal baş verəndə məktəbin rəhbərliyi məsələ ilə bağlı izahat verməli olur. Elə yaxşı olar ki, bu məsələdə müəyyən qədər təsir gücü, rəhbərliyə tabeçilik olsun”.
Aytəkin TOFİQQIZI