“İmtahanların tamamilə ləğv olunması ilə bağlı fikirlər reallığı əks etdirmir”.
Etmtv.space xəbər verir ki, bu fikirləri Məleykə Abbaszadə “ASAN Radio”ya müsahibəsində səsləndirib.
O bildirib ki, bəzi fikirlərdə imtahanların ümumiyyətlə ləğv olunması və ali məktəblərə sərbəst qəbul sisteminə keçid təklif edilir, lakin bu yanaşma real deyil.
“Bu, ciddi nəticələrə gətirib çıxara bilər”, – deyə o vurğulayıb.
Abbaszadə qeyd edib ki, bəzi ölkələrdə ali məktəbə qəbul yalnız buraxılış imtahanlarının nəticələri əsasında aparılır və Azərbaycan modelində də qismən bu yanaşma tətbiq olunur.
Onun sözlərinə görə, hazırda buraxılış imtahanında yüksək nəticə göstərən abituriyentlər müəyyən ixtisaslara qəbul ola bilirlər.
DİM sədri əlavə edib ki, ikinci mərhələ imtahanlarının saxlanılması və ya ləğvi müzakirə mövzusudur:
“Üç fənn üzrə ikinci mərhələ imtahanlarının zəruriliyi daim müzakirə edilir. Bu istiqamətdə Elm və Təhsil Nazirliyi ilə birgə baxışlar aparılır”.
O vurğulayıb ki, kütləvi qiymətləndirmənin ləğvi gündəmdə deyil və məqsəd vahid standartların qorunmasıdır:
“Ali təhsil sisteminin məqsədi odur ki, məzunlar əmək bazarında rəqabətqabiliyyətli olsunlar”.