Azərbaycan Milli Konservatoriyası son günlər bəzi internet resurslarında yayılan dezinformasiya xarakterli məlumatlara şəffaf və obyektiv faktlara əsaslanaraq münasibət bildirib.
Məsələ ilə bağlı Konservatoriyanın satınalma rəhbəri Orxan Vəliyevin açıqlamasını olduğu kimi təqdim edirik.
Bəzi media resurslarında Azərbaycan Milli Konservatoriyasının bərk məişət tullantılarının daşınması və zərərsizləşdirilməyə təhvil verilməsi xidməti üzrə bağladığı müqavilə ilə bağlı yayımlanmış məlumat hüquqi və faktiki baxımdan məsələnin mahiyyətini tam əks etdirmir.
İlk növbədə qeyd olunmalıdır ki, sözügedən xidmət ümumi bazar prinsipləri ilə göstərilən adi xidmət deyil. Azərbaycan Respublikası Prezidentinin 6 avqust 2008-ci il tarixli 2983 nömrəli Sərəncamına əsasən Bakı şəhərində əmələgəlmə mənbəyindən asılı olmayaraq bütün bərk məişət tullantılarının yığılması, daşınması və “Təmiz Şəhər” Açıq Səhmdar Cəmiyyətinə təhvil verilməsi Bakı Şəhər İcra Hakimiyyətinə həvalə edilmişdir.
Azərbaycan Respublikası Prezidenti yanında Antiinhisar və İstehlak Bazarına Nəzarət Dövlət Agentliyinin Azərbaycan Milli Konservatoriyasına ünvanladığı 04.02.2026-cı il tarixli, 3-54/2-1327/2026 nömrəli məktubda da bu hal açıq şəkildə göstərilmiş, eyni zamanda bildirilmişdir ki, həmin xidmətlərin göstərilməsi ilə bağlı Bakı Şəhər Mənzil-Kommunal Təsərrüfatı Departamentinin tabeliyində “Kommunal Xidmətlər Müəssisəsi” MMC təsis edilmiş və xidmətlərin həyata keçirilməsi aidiyyəti normativ hüquqi aktların tələblərinə uyğun təşkil olunur. Həmin məktubda ayrıca vurğulanır ki, məişət tullantılarının daşınması və zərərsizləşdirilməsi xidmətləri Azərbaycan Respublikası Nazirlər Kabinetinin 21 aprel 2005-ci il tarixli 74 nömrəli qərarı ilə təsdiq edilmiş qaydalara uyğun həyata keçirilir, bu xidmətlərin tarifləri isə Tarif (qiymət) Şurasının 24 noyabr 2011-ci il tarixli 5 nömrəli qərarı ilə müəyyən edilir. Buna görə də, həmin xidmətlərin satın alınmasının qeyd olunan normativ hüquqi sənədlərin tələblərinə uyğun həyata keçirilməsi məqsədəmüvafiq hesab edilmişdir.
Bu hüquqi vəziyyət “Dövlət satınalmaları haqqında” Azərbaycan Respublikasının Qanununun tətbiq dairəsini müəyyən edən 3-cü maddəsi ilə də uzlaşır. Həmin maddəyə əsasən yalnız dövlət orqanı və ya təbii inhisar subyekti tərəfindən təqdim edilən və qiymətləri dövlət tərəfindən tənzimlənən malların, işlərin və ya xidmətlərin satın alınmasına “Dövlət satınalmaları haqqında” Azərbaycan Respublikasının Qanunu şamil edilmir.
Beləliklə, hazırki məsələyən “adi tender keçirilib və vergi borcu olan müəssisə qalib elan edilib” şəklində yanaşma hüquqi baxımdan düzgün deyil. Çünki burada söhbət xüsusi qaydada təşkil olunan, mərkəzləşdirilmiş kommunal xidmətdən gedir və bu xidmət üzrə münasibətlər ümumi satınalma mexanizminin klassik tətbiqindən fərqlənir.
Bununla yanaşı, Azərbaycan Milli Konservatoriyası qanunun birbaşa şamil edilməməsinə baxmayaraq məsələni maksimum diqqət və məsuliyyətlə araşdırmış, qarşı tərəfdən müvafiq sənədləri tələb etmişdir. Təqdim edilmiş sənədlər arasında vergi orqanı tərəfindən verilmiş arayış da olmuşdur. Həmin arayışda “Kommunal Xidmətlər Müəssisəsi” Məhdud Məsuliyyətli Cəmiyyətinin vergilər və digər icbari ödənişlər üzrə vaxtı keçmiş öhdəliklərinin olmadığı, yəni “borc yoxdur” qeydinin mövcud olduğu açıq şəkildə əks etdirilmişdir. Başqa sözlə, satınalan təşkilat qərar qəbul edərkən sonradan mediada irəli sürülən ehtimallara deyil, təqdim olunmuş rəsmi sənədlərə əsaslanmışdır.
Mediada istinad edilən vergi borcu barədə məlumatın sonradan yaranmış olması da istisna edilmir. Hazırda 2026-cı ilin birinci rübü yekunlaşdığından vergi ödəyiciləri tərəfindən vergi xidmətinə müvafiq hesabatlar təqdim olunur və bunun nəticəsində qanunvericiliyə uyğun vergi öhdəlikləri hesablanır. Bu baxımdan, müqavilənin bağlandığı tarixdə təqdim olunmuş rəsmi arayışla sonrakı tarixdə elektron informasiya resursunda görünən məlumatın eyni zaman kəsiyinə aid edilmədən müqayisə olunması düzgün hüquqi nəticəyə gətirmir. Başqa sözlə, müqavilə bağlanan tarixdə rəsmi arayışda borcun olmadığı göstərildiyi halda, sonradan hesabatların təqdim edilməsi nəticəsində öhdəliyin yaranması hüquqi baxımdan mümkün haldır və bu, əvvəlki mərhələdə qəbul edilmiş qərarı öz-özlüyündə qanunsuz etmir.
Digər mühüm məqam ondan ibarətdir ki, Azərbaycan Milli Konservatoriyası şəffaflıq və aşkarlıq prinsiplərinə sadiq qalaraq, “Dövlət satınalmaları haqqında” Qanunun 3.2.1-ci maddəsinə görə həmin Qanunun birbaşa şamil edilmədiyi bu müqaviləni belə elektron portalda dərc etdirmişdir. Bu yanaşma qurumun hər hansı məlumatı gizlətmək niyyətində olmadığını, əksinə, fəaliyyətini açıq və hesabatlı şəkildə təşkil etdiyini göstərir. Qanunun 4.1-ci maddəsində nəzərdə tutulan şəffaflıq və aşkarlıq prinsiplərinə faktiki əməl olunması da məhz burada öz ifadəsini tapır.
Bundan başqa, “Media haqqında” Azərbaycan Respublikası Qanununun 14.1.11-ci maddəsinə əsasən faktlar və hadisələr qərəzsiz və obyektiv təqdim edilməli, 14.1.11-1-ci maddəsinə əsasən isə saxta məlumatların dərc edilməsinə və ya yayımlanmasına yol verilməməlidir. Həmin Qanunun 14.1.7-ci və 14.1.9-cu maddələri də şəxsin işgüzar nüfuzunun ləkələnməsinə, böhtana və təhqirə yol verilməməsini tələb edir. Bu baxımdan, məsələnin hüquqi mahiyyəti, tətbiq olunan xüsusi normativ baza, səlahiyyətli dövlət orqanının rəsmi mövqeyi və satınalma zamanı təqdim olunmuş rəsmi sənədlər nəzərə alınmadan məsələni birtərəfli qaydada “qanun pozuntusu” kimi təqdim etmək düzgün yanaşma hesab oluna bilməz.
Nəticə etibarilə, Azərbaycan Milli Konservatoriyası tərəfindən bərk məişət tullantılarının daşınması və zərərsizləşdirilməyə təhvil verilməsi xidməti üzrə bağlanmış müqavilə mövcud qanunvericiliyin, aidiyyəti xüsusi normativ aktların, səlahiyyətli dövlət orqanının rəsmi izahının və təqdim olunmuş rəsmi sənədlərin əsasında həyata keçirilmişdir. Müqavilə bağlanarkən təqdim edilmiş arayışda qarşı tərəfin vergilər və digər icbari ödənişlər üzrə vaxtı keçmiş borcunun olmadığı göstərilmiş, bununla yanaşı, Azərbaycan Milli Konservatoriyası əlavə şəffaflıq nümayiş etdirərək həmin müqaviləni elektron portalda da dərc etdirmişdir. Buna görə də yayılan iddialar hüquqi və faktiki əsasdan məhrumdur, məsələnin mahiyyətini tam əks etdirmir və ictimaiyyətdə yanlış təsəvvür formalaşdırır.
Azərbaycan Milli Konservatoriyasının
Satınalma rəhbəri Orxan Vəliyev.