Təhsil ocaqlarında teatral fəaliyyət estetik tərbiyənin ümumi sisteminin ayrılmaz hissəsi hesab olunur. B, təhsilalanların ümumi bədii yaradıcılığına böyük üstünlük verilir. Bir çox təhsil ocaqlarında bu iş daha yüksək səviyyədə təşkil olunmuşdur. Tərbiyəvi işin düzgün qurulduğu müəssisələrdə bədii yaradıcılıq fəaliyyətinə maraq və həvəs də böyük olur. Bu estetik tərbiyəyə nə dərəcədə diqqətin ayrıldığı onların özfəaliyyət kollektivlərindəki ən yaxşı işlərdən tez diqqətə çatır. Demək, burada bədii təşəbbüsün və özfəaliyyət kollektivlərinin inkişafı üçün böyük işlər görülmüşdür, yaradıcı keyfiyyətlərin aşkar edilib inkişaf etdirilməsi ilə bağlı vəzifələr vicdanla yerinə yetirilmişdir.
Bəs tələbələrin incəsənətlə məşğul olması onlara nə verir? Təlim-tərbiyədə teatr fəaliyyəti nədir? Bu fəaliyyətin tərbiyəvi və maarifləndirici gücü nədədir?
Buna tam cavabı Gəncə Tibb Kollecdə fəaliyyət göstərən dərnəklərin fəaliyyətində tapa bildik.
Gənclərin asudə vaxtlarının səmərəli təşkili onların şəxsi inkişafı, yaradıcılıq qabiliyyətlərinin artırılması və sosial aktivliyinin gücləndirilməsi baxımından mühüm əhəmiyyət daşıyır. Bu məqsədlə Gəncə Tibb Kollecinin direktoru Mehman Rzayev tərəfindən üç il əvvəl müxtəlif istiqamətləri əhatə edən dərnək yaradılmışdır. Dərnəyin rəhbəri Mehriban Binnət qızıdır. Dərnəyin əsas məqsədi tələbələrin boş vaxtlarını faydalı və maraqlı fəaliyyətlərlə keçirməsini təmin etməkdir.
Kollecdə fəaliyyət göstərən dərnəklər müxtəlif sahələri əhatə edir. Bunlara kitab oxuma dərnəyi, kitabxana fəaliyyəti, ədəbiyyat və şeir dərnəkləri, musiqi və rəqs dərnəkləri, şahmat və dama dərnəkləri, eləcə də aparıcılıq və aktyorluq istiqamətləri daxildir. Kitab oxuma dərnəyi tələbələrin mütaliə vərdişlərini inkişaf etdirməyə xidmət edir. Gənclər evində mövcud olan kitablar tələbələrin istifadəsinə təqdim olunur və onlar bu imkanlardan aktiv şəkildə yararlanırlar. Bundan əlavə, kitabxana ilə əməkdaşlıq çərçivəsində tələbələr müxtəlif ədəbiyyat nümunələrinə çıxış əldə edirlər.
Ədəbiyyat və şeir dərnəklərində istedadlı tələbələr üzə çıxarılır, onların yaradıcılıq bacarıqları inkişaf etdirilir. Bəzi tələbələr həm şeir demək, həm də şeir yazmaq qabiliyyətinə malikdirlər və bu sahədə öz bacarıqlarını uğurla nümayiş etdirirlər. Nəbiyeva Xalidə və İsmayılova Nurlanəni misal çəkmək olar.
Musiqi və rəqs dərnəkləri tələbələrin estetik zövqünü formalaşdırır. Burada tələbələr müxtəlif musiqi alətlərində, o cümlədən baraban, skripka, gitara və fortepianoda ifa etməyi öyrənir, həmçinin milli rəqslər və vals kimi rəqs növlərini mənimsəyirlər.
Dərnək çərçivəsində aktyorluq bacarıqlarına malik tələbələr də fəaliyyət göstərir və bu sahədə özlərini inkişaf etdirirlər. Bununla yanaşı, aparıcılıq dərnəyi də mövcuddur. Bu istiqamətdə təxminən 8-10 nəfər tələbə fəaliyyət göstərir və müxtəlif tədbirlərdə aparıcılıq edərək təcrübə qazanırlar.
Şahmat və dama dərnəklərində isə tələbələr fəal iştirak edir, onların arasında mütəmadi olaraq yarışlar təşkil olunur ki, bu da onların məntiqi düşüncə qabiliyyətinin inkişafına töhfə verir.
Dərnək çərçivəsində tələbələr şeir ifası, musiqi və rəqs nominasiyaları üzrə regional müsabiqələrdə iştirak edirlər. Bu müsabiqələrdə uğur qazanan, xüsusilə birinci yerə layiq görülən tələbələr respublika səviyyəli yarışlara göndərilir və kolleci layiqincə təmsil edirlər. 2 il öncə ifa nominasiyası üzrə regionda və respublika müsabiqəsində 1-ci yerə çıxan Qocayeva Fatimə, o cümlədən regionda Rəqs nominasiyası üzrə 2-ci yerə çıxan Sadıxova Xədicə və şeir nominasiyası üzrə regionda 1-ci yerə çıxan, respublika müsabiqəsində isə iki dəfə 2-ci yerə çıxan Nəbiyeva Xalidəni buna misal çəkmək olar.
Ümumilikdə, dərnəklərdə iştirak edən tələbələrin sayı orta hesabla 35-45 nəfər arasında dəyişir. Bu da gənclərin bu fəaliyyətlərə böyük maraq göstərdiyini sübut edir. Nəticə etibarilə, Gəncə Tibb Kollecində təşkil olunan dərnəklər tələbələrin hərtərəfli inkişafına mühüm töhfə verir və onların asudə vaxtlarının səmərəli təşkilində əhəmiyyətli rol oynayır.
P.S.Təhsil ocaqlarında teatral fəaliyyət ümumi tərbiyəvi məqsədləri özündə daşıyır. Bu iş daha bacarıqlı rəhbərlərin nəzarəti altında təhsilalanların estetik zövqünü oxşayır. Teatral fəaliyyət təlim-tərbiyə sisteminin tərkib hissəsinə çevriləril, bu tərbiyəni tamamlayır.
Bu işdə Gəncə Tibb Kollecinin rəhbərliyinə, dərnəklərin fəaliyyətində əziyyət çəkən bütün insanlara təşəkkürümüzü bildiririk.
