Təhsil millətin gələcəyidir. Ümummilli Lider Heydər Əliyev uşaqları gələcəyimiz kimi dəyərləndirir, onların hərtərəfli inkişafı üçün zəruri addımların atılmasını qarşıya mühüm vəzifə kimi qoyurdu. Bu vəzifələr uşaqların təhsili, onların vətənpərvərlik ruhunda tərbiyəsi prioritet məsələ kimi bu gün də öndə dayanır. Azərbaycanda təhsilin inkişafı istiqamətində atılan addımlar və onların uğurlu nəticələri qürurvericidir. Ulu Öndər Heydər Əliyevin siyasi kursunu uğurla davam etdirən Prezident İlham Əliyev və Birinci vitse-prezident Mehriban xanım Əliyeva bu sahəyə xüsusi diqqət göstərirlər.
Ümumilikdə təhsil hər bir dövlətin inkişaf səviyyəsinin göstəricisidir. Bu gün Azərbaycanda savadlılıq səviyyəsinin 100 faiz olması təhsil sahəsində aparılan islahatların, görülən tədbirlərin uğurlu nəticələridir. Dövlət başçısı İlham Əliyev və Birinci vitse-prezident Mehriban xanım Əliyeva təhsilin inkişafını daim diqqətdə saxlayaraq bu sahədə əsas göstərici olan məktəblərin tikintisinə, onların maddi-texniki bazasının möhkəmləndirilməsinə xüsusi diqqət yetirirlər. Hər yeni tədris ilində neçə-neçə məktəbin tikintisi, yaxud əsaslı təmir edilərək istifadəyə verilməsi, Prezident İlham Əliyevin və birinci xanım Mehriban Əliyevanın onların açılışında iştirakı ölkəmizdə təhsilin nə qədər xüsusi önəm kəsb etdiyini açıqlayır. Heydər Əliyev Fondunun “Yeniləşən Azərbaycana yeni məktəb” layihəsi çərçivəsində iki mindən artıq məktəbin tikilməsi, yaxud əsaslı təmiri də bunun bariz nümunəsidir.
Qurtuluşumuzun başlıca yekunu müstəqilliyimizin əbədi xarakter alması, dönməz prosesə çevrilməsidir. Bu prosesdə biz pedaqoqlar da yaxından iştirak edir, ölkəmizin yüksəlişi naminə daha da əzmlə çalışırıq. Xalqımıza xas olan mənəvi, etik-əxlaqi keyfiyyətlər təhsil ocaqlarında gənc nəslin damarlarına hopur, istər orta, istərsə də ali təhsil müəssisələrində Azərbaycan dövlətinə və dövlətçiliyimizə sadiq vətəndaşlar formalaşdırılır. Onlar dövlətimizə məhəbbət ruhunda tərbiyə olunur. Cəmiyyətimizin ziyalı təbəqəsi sayılan müəllimlər bütün işlərdə dövlətimizə sədaqət nümayiş etdirir, xalqımızın övladlarında mənəvi keyfiyyətlərin formalaşdırılması, ləyaqətli insanların tərbiyəsi yolunda əzmlə çalışırlar.
Bu gün doğma Azərbaycanımız qüdrətlənir, təhsilin səviyyəsi də ilbəil artır, demokratik prinsiplər möhkəmlənir. Ölkəmizdə təhsilin inkişafı sahəsində həyata keçirilən köklü islahatların nəticəsində böyük uğurlara imza atılmışdır. Bu, təhsil işçilərini daha da yaxşı işləməyə, təhsilin keyfiyyətinin yüksəlməsinə, təhsillə bağlı dövlət proqramlarından, normativ sənədlərdən irəli gələn tədbirlərin həyata keçirilməsi istiqamətində fəaliyyətini daha da artırmağa ruhlandırmışdır.
Dövlətimiz təhsili və təhsil sistemini ölkəmizin inkişafının ən önəmli, prioritet istiqamətlərindən biri kimi həmişə diqqət mərkəzində saxlayır. Bu gün keçmiş sovetlər birliyindən qalan köhnə məktəb binalarının yerində artıq yeni, müasir binalar ucaldılır. Bəziləri isə ən yüksək standartlara cavab verən səviyyədə əsaslı surətdə təmir etdirilir. Hər cür şəraiti olan bu məktəb binaları tədrisin və təhsilin yüksək səviyyəcə inkişafına imkan yaradır. Bu binalar təhsilin müasir standartlara uyğun səviyyədə təşkili üçün hər cür şəraitə malikdir.
Regionların sosial – iqtisadi inkişafı ilə bağlı Dövlət Proqramı çərçivəsində Respublikamızın bütün bölgələrində olduğu kimi, Gəncə şəhərində də tikinti və quruculuq işləri geniş vüsət almışdır. Dövlət proqramının icrası ilə əlaqədar regionlarda sosial infrastruktur obyektlərinin, xüsusən də təhsil müəssisələrinin tikintisi, əsaslı təmiri və maddi-texniki bazasının müasir tələblərə uyğun qurulması işləri Gəncə şəhərində bu gün də davam etdirilir. Gəncə şəhərində fəaliyyət göstərən təhsil ocaqlarında aparılan bu yenidənqurma, təmir-tikinti işləri şəhərimizin Mehdi Mehdizadə adına 4 nömrəli xarici dil təmayüllü məktəb – liseydən də yan keçməyib. Məktəbimiz günümüzün tələblərinə cavab verəcək tərzdə təmir olunmuş, məktəb öz görkəmini dəyişmiş, burada təhsilin müasir inkişafı üçün hər cür şərait yaradılmışdır. Görülən bu işlər dövlətimizin milli təhsilimizin inkişafına yönəldilən təhsil siyasətinin uğurla həyata keçirilməsinə bir daha əyani sübutdur.
Biz təhsil işçiləri dövlət başçımızın təhsilə göstərdiyi bu qayğıdan sevinir və bizə yaratdığı bu gözəl şəraitə görə ona öz dərin minnətdarlığımızı bildiririk. Bu, həm də bizi daha da ruhlandırıb, məktəbimizin müəllim – pedaqoq heyətini təhsilimizi ən uca zirvələrdə görməyə can atan işgüzarlığını artırıb.
Təhsilimizə göstərilən qayğı, məktəblilərin yüksək savada, biliyə sahib olmaları üçün yaradılan şərait əldə olunan göstəricilərdə də özünün aydın ifadəsini tapır. Bu gün böyük fəxr hissi ilə qeyd edirik ki, ümumtəhsil məktəblərində yaradılan möhkəm təməl ali təhsil ocaqlarına yüksək balla daxil olmağa, elmin sirlərinə dərindən yiyələnməyə, ən əsası qalib Azərbaycanın daha da güclənməsinə, qüdrətlənməsinə dəstək göstərməyə böyük stimul verir.
Bu gün bütün sahələrdə olduğu kimi, ölkəmizdə təhsilə, mədəniyyətə, milli-mənəvi dəyərlərin qorunmasına xüsusi diqqət yetirilir. Ümummilli Lider Heydər Əliyevin əsasını qoyduğu və Azərbaycan Respublikasının Prezidenti cənab İlham Əliyev tərəfindən qətiyyətlə davam etdirilən dövlət-təhsil siyasətinin uğurları böyükdür. Ölkəmizdə milli təhsilimiz cənab Prezident İlham Əliyev və Yeni Azərbaycan Partiyasının apardığı uğurlu siyasət nəticəsində öz yüksəliş dövrünü yaşayır. Hər birimiz özümüzü dövlətin əsgəri hesab edirik və göstərilmiş etimadı doğrultmaq üçün var gücümüzlə çalışırıq.
Keçirdiyimiz bütün iclas və tədbirlərdə biz Yeni Azərbaycan Partiyası təşkilatının qurucusu Ulu Öndər Heydər Əliyevin Azərbaycan tarixindəki misilsiz xidmətlərindən, Prezident İlham Əliyevin rəhbərliyi ilə partiyanın bu gün gördüyü işlərdən, YAP-ın Azərbaycan dövlətçiliyinin inkişafına verdiyi töhfələrdən danışır və bu haqda geniş məlumat veririk. M. Mehdizadə adına Gəncə şəhər 4 nömrəli xarici dil təmayüllü məktəb – liseydə YAP-ın ilk partiya təşkilatının yaradılması günündən üzü bəri bu illər ərzində biz pedaqoqlar, partiyanın hər bir üzvünə dövlət quruculuğunda, Azərbaycan naminə fəaliyyətlərində xüsusi fəallıq hissləri aşılamış, şagirdlərimizin vətənimizə və dövlətimizə layiqli vətəndaşlar kimi yetişdirilməsinə can atmış, bu yolda var qüvvəmizi əsirgəməmişik.
Əliağa Səfərəliyev,
M. Mehdizadə adına Gəncə şəhər 4 nömrəli xarici dil təmayüllü məktəb – liseyin direktoru, Respublikanın Əməkdar müəllimi.
.