03 aprel 2026-cı il tarixində Aprel döyüşlərinin 10-cu ildönümünə həsr olunmuş “Aprel döyüşləri – şanlı tariximiz” adlı maarifləndirici tədbir baş tutub. Gəncə-Daşkəsən Regional Gənclər və İdman İdarəsi və Azərbaycan Dövlət Aqrar Universitetinin birgə təşkilatçılığı ilə keçirilən tədbir Heydər Əliyevin və şəhidlərin xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Tədbirin rəsmi hissəsində universitetin tədris işləri üzrə prorektoru Əhməd Məlikov və idarənin rəisi Elşən Hüseynov çıxış edərək Aprel döyüşlərinin əhəmiyyətindən danışıb. Bildirilib ki, 2016-cı ilin aprel ayında Ermənistan silahlı qüvvələrinin cəbhəboyu törətdiyi təxribatlara Azərbaycan Ordusu sürətli əks-həmlə əməliyyatları ilə cavab verib. Bu döyüşlər Ermənistan ordusunun “yenilməzlik” mifini darmadağın edib və xalqımızın döyüş ruhunu gücləndirib, həmçinin 2020-ci ilin Vətən müharibəsində qazanılan tarixi Zəfərin mənəvi və strateji təməlini qoyub.
Tədbirdə “Şanlı Aprel” adlı qısa film nümayiş olunub və Aprel döyüşlərinə həsr olunmuş şeir səsləndirilib. Ehtiyatda olan baş leytenant Əhliyət Mehdiyev döyüşlər haqqında danışaraq Azərbaycan Ordusunun yüksək peşəkarlığını vurğulayıb.
Həmçinin digər döyüş iştirakçıları – Aslan Cəfərov, Elvin İbadov, Nemət Abdullayev, Ramil Qasımov, Mahur Həmidov, Kamran Zeynalov və Zöhrab Əsgərov tədbirdə iştirak ediblər.
Gənclər tərəfindən Vətən müharibəsi iştirakçılarına suallar ünvanlanıb, maraq doğuran mövzular ətrafında müzakirələr aparılıb. Tədbirdə şəhid ailələri – Brilliant Əsgərova və Rəfiqə Süleymanova çıxış edərək övladlarının xatirəsini yad ediblər.
Aprel döyüşləri Azərbaycanın dövlətçilik tarixində şanlı səhifə olaraq böyük ehtiramla anılır.
Mənbə: Patriot News.az
