Gəncə Dövlət Milli Teatrı festivalda “Pəri cadu” tamaşası ilə çıxış edəcək

Avrasiya Teatrlar Birliyi regionda teatr sənətinin inkişafı, beynəlxalq əməkdaşlıq və festivalların təşkili ilə məşğul olan qurumdur. Birlik, Azərbaycan dünyanın bir çox ölkələrinin teatrları arasında əlaqələrini gücləndirir, Gəncə Dövlət Dram Teatrı kimi kollektivlərin Beynəlxalq Teatr Festivalı kimi mötəbər tədbirlərdə iştirakına dəstək verir.  Hal – hazırda Avrasiya Teatrlar Birliyində 48 ölkə təmsil olunur və hər bir ölkə teatrları ilə əlaqələr günü-gündən genişləndirilməkdədir.

    Avrasiya Teatrlar Birliyinin fəaliyyət istiqamətləri və Əlaqələri geniş olmaqla  Beynəlxalq Festivallarda iştirak edir.  Birlik, İstanbul (Maltəpə) və Ankara (Etos) kimi şəhərlərdə beynəlxalq teatr festivalları təşkil etmiş, Azərbaycan teatrlarının bu tədbirlərdə  bir sıra tamaşalarla uğurla çıxış etməsini təmin etmişdir.

    Avrasiya Teatrlar Birliyi beynəlxalq mədəni əməkdaşlığa da böyük töfhə verməkdədir.  Birlik Şəki Beynəlxalq Teatr Festivalı kimi yerli tədbirlərə də dəstək verərək, regionlararası mədəni mübadiləni artırır.

   Avrasiya Teatrlar Birliyi Qazaxıstan Beynəlxalq Teatr Festivalı kimi tədbirlərdə də münsiflər heyətində təmsil olunaraq teatr sənətinin qiymətləndirilməsində də iştirak edir. Bu birlik, Avrasiya məkanında teatr sənətinin ortaq dəyərlər əsasında inkişafına töhfə verir.

    Gəncə Dövlət Milli Dram Teatrının aktyoru Yusif Cəfərov Avrasiya Teatrlar Birliyinin Azərbaycan üzrə təmsilçisidir.

    Yusif Cəfərov Avrasiya məkanında mədəniyyətlərarası teatr əlaqələrinin inkişafına verdiyi mühüm töhfələrlə tanınan azərbaycanlı aktyor, rejissor və beynəlxalq teatr təşkilatçısıdır. O, 25 oktyabr 1970-ci ildə Azərbaycan Respublikasının Gəncə şəhərində anadan olmuşdur və Gəncə Dövlət Milli Dram Teatrının aparıcı sənətçilərindəndir.

      Yusif Cəfərov Avrasiya Teatr Birliyinin təsisçilərindən biri olmaqla yanaşı, həmin Birliyin Azərbaycan üzrə ilk və rəsmi nümayəndəsidir. İyirmi ildən artıq müddət ərzində Azərbaycan teatrının beynəlxalq miqyasda tanıdılması istiqamətində ardıcıl fəaliyyət göstərmiş, Avropa və Asiyanın nüfuzlu teatr festivallarında  Azərbaycan teatrlarının iştirakını təşkil etmişdir.

     2011-ci ildən etibarən bir sıra beynəlxalq mədəniyyət və incəsənət layihələrinin təşəbbüskarı və təşkilatçısı olmuş, Gəncə Dövlət Dram Teatrı başda olmaqla müxtəlif Azərbaycan teatrlarının Türkiyə, Ukrayna, Gürcüstan, Qazaxıstan, Rumıniya, Portuqaliya, Litva, İtaliya və Amerika Birləşmiş Ştatlarında keçirilən festivallarda ilk dəfə iştirakını təmin etmişdir. Onun rəhbərliyi ilə səhnələşdirilən Azərbaycan tamaşaları beynəlxalq arenada yüksək qiymətləndirilmiş və 2024-cü ildə Portuqaliyanın Braqa şəhərində keçirilən “MIT III” Beynəlxalq Teatr Festivalında Ejen İoneskonun “Kral ölür” əsərinə görə Qran-Pri mükafatına layiq görülmüşdür.

     Onun təşkilatçılığı ilə Gəncə Dövlət Milli Dram Teatrı Özbəkistan, Gürcüstan, Rumıniya və Portuqaliya teatrları ilə yaradıcılıq memorandumları imzalamışdır.

     Yusif Cəfərov Türkiyə, Gürcüstan, Qazaxıstan, Rumıniya və digər ölkələrdə keçirilən bir çox beynəlxalq teatr festivallarında münsiflər heyətinin üzvü və fəxri qonaq qismində iştirak etmişdir. 2016-cı ildə səhnə sənətinin inkişafındakı xidmətlərinə görə Azərbaycan Respublikası Mədəniyyət Nazirliyi tərəfindən “Azərbaycanın Fəxri Mədəniyyət İşçisi” fəxri adına layiq görülmüşdür.

     Hazırda teatr rejissoru, festival təşkilatçısı və mədəniyyət səfiri kimi fəaliyyətini davam etdirir, beynəlxalq əməkdaşlığın genişlənməsinə töhfə verir və Azərbaycan teatrını dünya səhnəsində layiqincə təmsil edir.

-Yusif müəllim, teatrla ilk tanışlığınız necə olub və həyatınızda hansı iz salıb? Necə olub ki, həyatınızı teatrla bağlamağı qərara alıbsınız?

    -Atam Cəfərov Faiq teatrda işləyib. Aktyor, truppa müdürü, quruluş hissə müdürü. Elə uşaqlıqdan mən də teatra gəlib getmişəm.Tamaşalara baxmışam. O zamanlardan da aktyorluğa böyük həvəsim yarandı. 1987-ci ildə yeni açılmış Kukla Teatrında işləməyə başladım, 1990-cı ildə Nizami poeziya teatrına dəvət aldım və eyni zamanda da Gəncə Dövlət Dram teatrında fəaliyyətimi davam etdirdim.

    – Teatrda ilk rolunuz necə yadda qalıb?

    -Poeziya teatrında ilk rolum “Bəhram şah” tamaşasında Bəhram şah rolu olub. Dram Teatrda isə ilk işimi “Bəxtsiz cavan” tamaşasında Fərhad rolu ilə başlamışam. “Bəhram şah” hazırlanan zaman böyük sənətkarlar – xalq artisti Zülfüqar Baratzadə, əməkdar artist Rza Nadirov, Əlican Əzizov, Əli Allahverdiyev kimi sənətkarlarla bir səhnəni bölüşmək həm sevindirici, həm də çətin idi.

    -Yəqin ki, ilk rollarınız çətin olduğu kimi, həm də məsuliyyətli bir addımlar olub. İlk rolunuz zamanı hansı hissləri keçirirdiniz?

     -Düşünürdüm ki, Kukla teatrında işləmək daha rahat idi. Amma artıq gec idi. Hər şeyə öyrəşmək lazım idi. Doğrusu elə sənətkarların qarşısında baş rol oynamağa utanırdım.

    -Sonralar necə, baş rolları ifa etmisinizmi?

    -Son zamanlara qədər demək olar ki əsasən baş rollar oynamışam. Sonra isə meylimi beynəlxalq əlaqələrə saldım və rolların bəzilərindən imtina etdim.

     -Teatrın beynəlxalq əlaqələri bizə nə verir?

     -İndiki zamanda teatrlar öz qazanında qaynayanda elə düşünürlər ki, onlardan heç yerdə yoxdur. Amma indi elə dövrdür ki, gedib dünya teatrlarını görmək, öyrənmək və öyrətmək lazımdır. Bu baxımdan Beynəlxalq əlaqələr mütləqdir və vacibdir.

     -Beynəlxalq əlaqələr bu gün də davam etdirilirmi? Qarşıda hansı planlarınız vardır?

    -Bəli, işimizi bu gün də uğurla davam etdiririk.11-26 aprel tarixlərində Trabzonda keçiriləcək beynəlxalq teatr festivalının təşkilat komitəsinə dəvət olunmuşam və orda təmsil olunuram. Həmin festivala 10 xarici ölkənin teatr kollektivini dəvət etmişəm. İtaliya, Fransa, Hon Kong, Moldova, Şri Lanka, Rumıniya, Qazaxstan, Azərbaycan, Gürcüstan, Özbəkistan kimi ölkə teatrları mənim dəvətimlə festivalda iştirak edəcək.

     Gəncə Dövlət Milli Teatrı həmin festivalda Pəri cadu tamaşası ilə çıxış edəcək.

Ruhulla Zahidov,

yazıçı-jurnalist.