Baharın müjdəçisi olan Novruz bayramı xalqımızın ən zəngin və rəngarəng ənənələrini özündə birləşdirir. Novruz süfrəsinin bəzəyi olan ən məşhur şirniyyatlardan biri – ulduz formasını xatırladan paxlava isə əsrlərdir ki, Gəncə şəhərinin ən ləziz və ən şirin bayram ənənələrindən biri kimi yaşadılır.
Məhz bu ənənəni yaşatmaq və geniş şəkildə tanıtmaq məqsədilə Paxlava Festivalı təşkil olunur. Festival Gəncə Dünya Məktəbinin təşəbbüsü ilə keçiriləcək və şəhər sakinləri ilə yanaşı ətraf rayonların sakinləri də bu bayram tədbirinə dəvət olunurlar.
Festival çərçivəsində ziyarətçiləri zəngin və maraqlı proqram gözləyir. Tədbirdə Novruz adət-ənənələri nümayiş olunacaq, bayram şirniyyatları və milli mətbəxin ləziz nümunələri təqdim ediləcək. Bununla yanaşı, bayram konsert proqramı təşkil olunacaq, kəndirbaz və pəhləvan çıxışları, müxtəlif idman oyunları və Gəncə sənətkarlıq nümunələri nümayiş etdiriləcək.
Qeyd edək ki, festival sərgi-satış xarakteri daşıyacaq və hər kəs üçün açıq olacaq. Tədbir iştirakçıları burada baharın gəlişini əks etdirən bayram ab-havasını hiss edərək xoş və unudulmaz anlar yaşayacaqlar.
Gəncə Dünya Məktəbi hər kəsi Paxlava Festivalında iştirak etməyə və bayram sevincini birgə bölüşməyə dəvət edir!