Gəncə Şəhər İcra Hakimiyyətinin və Yeni Azərbaycan Partiyası Gəncə şəhər təşkilatının birgə təşkilatçılığı ilə 8 Mart – Beynəlxalq Qadınlar Gününə həsr olunmuş bayram tədbiri keçirilib.
YAP Gəncə şəhər təşkilatının inzibati binasında keçirilən tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, Azərbaycan Dövlət Aqrar Universitetinin rektoru Zəfər Qurbanov, Azərbaycan Texnologiya Universitetinin rektoru Yaşar Ömərov, Gəncə Tibb Kollecinin direktoru, Əməkdar həkim Mehman Rzayev, eləcə də idarə, müəssisə və təşkilat rəhbərləri iştirak ediblər.
Əvvəlcə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib, ardından Azərbaycan Respublikasının Dövlət Himni səsləndirilib.
Niyazi Bayramov qadınları 8 Mart – Beynəlxalq Qadınlar Günü münasibətilə təbrik edərək, Azərbaycan qadınlarının cəmiyyətin inkişafında mühüm rol oynadıqlarını bildirib və dövlət tərəfindən qadın hüquqlarının qorunmasına xüsusi diqqət yetirildiyini vurğulayıb.
Bayram Aslanov çıxışında Azərbaycan qadınlarının zəkası, biliyi və fədakarlığı ilə cəmiyyət həyatında mühüm yer tutduğunu qeyd edib.
Recep Öztop və Mehman Rzayev isə çıxışlarında qadınların cəmiyyətin müxtəlif sahələrində böyük uğurlara imza atdıqlarını qeyd ediblər.
Daha sonra Gəncə şəhərinin ictimai-siyasi və sosial-mədəni həyatında fəallığı ilə seçilən bir qrup xanıma YAP Gəncə şəhər təşkilatının “Təqdirnamə”ləri təqdim olunub.
Bayram tədbiri Yeni Azərbaycan Partiyasının Himninin səsləndirilməsi ilə başa çatıb.
