Gəncə-Daşkəsən Regional Təhsil İdarəsinin təşkilatçılığı ilə 2025-ci təqvim ilinin yekunlarına həsr olunmuş ümumi təhsil müəssisələrinin direktorları ilə geniş tərkibli görüş keçirilib. Görüş regionda təhsilin mövcud vəziyyətinin qiymətləndirilməsi, əldə olunan nəticələrin təhlili və qarşıdakı dövr üçün prioritetlərin müəyyənləşdirilməsi məqsədi daşıyıb.
Tədbirdə Gəncə-Daşkəsən RTİ-nin müdiri Elçin Kərimov, təhsil sektorlarının müdirləri, idarənin əməkdaşları və şagird sayı 300-dən çox olan ümumi təhsil müəssisələrinin direktorları iştirak ediblər.
İclasda təqdimatla çıxış edən idarə müdiri Elçin Kərimov 2025-ci il ərzində ümumi təhsil müəssisələrinin fəaliyyəti üzrə əsas göstəricilər, statistik məlumatlar və əldə olunmuş nəticələr barədə ətraflı məlumat verib. Qeyd olunub ki, il ərzində həyata keçirilən məqsədyönlü tədbirlər təhsilin keyfiyyətinin yüksəldilməsinə, şagird nailiyyətlərinin artırılmasına və idarəetmədə effektivliyin gücləndirilməsinə xidmət edib.
Görüş zamanı IV və VI siniflər üzrə fənn aylıqlarının icra vəziyyəti, müxtəlif səviyyəli dərsdinləmələrin təşkili və nəticələri, Respublika Fənn Olimpiadaları və “BilBacar” müsabiqəsində iştirak səviyyəsi, ümumi təhsil müəssisələrinin qiymətləndirmə nəticələrinin təhlili, IV və VI siniflər üzrə monitorinq nəticələrinin ümumiləşdirilməsi, eləcə də IX sinif buraxılış imtahanlarının nəticələrinin müqayisəli analizi təqdim olunub.
Təhlillər zamanı əldə olunan müsbət nəticələrlə yanaşı, mövcud problemlər və təkmilləşdirilməsi vacib olan istiqamətlər də diqqətə çatdırılıb. Direktorların tədris prosesinin təşkili, şagird nailiyyətlərinin yüksəldilməsi və məktəbdaxili idarəetmənin gücləndirilməsi sahəsində rolu xüsusi vurğulanıb.
Görüş qarşılıqlı fikir mübadiləsi və diskussiya şəklində davam edib. Təhsil müəssisələrinin rəhbərləri tərəfindən səsləndirilən suallar cavablandırılıb, təhsil sisteminin daha da inkişaf etdirilməsi ilə bağlı təklif və rəylər dinlənilib. Sonda qarşıdakı dövr üçün fəaliyyət istiqamətləri müəyyənləşdirilib və təhsildə keyfiyyətin yüksəldilməsi əsas prioritet kimi qeyd olunub.
