Dünən Masazır kəndi Əliağa Vahid adına 1 nömrəli tam orta ümumtəhsil məktəbində 1-ci sinif şagirdi dünyasını dəyişib.
Abşeron- Xızı Regional Təhsil İdarəsindən bildirilib ki, məktəbli saat 11:30 radələrində dərsdən çıxıb evə gedərkən təhsil müəssisəsinin həyətində qəfil halı pisləşib:
“Məsələ ilə bağlı dərhal Təcili Tibbi Yardım Xidmətinə məlumat verilib. Şagird qohumu tərəfindən tibb müəssisəsinə aparılıb. Bir müddət sonra şagirdin vəfat etməsi ilə bağlı məlumat yayılıb. Hazırda ölüm faktının səbəbi müvafiq qurumlar tərəfindən araşdırılır. Şagirdimizin vəfatı ilə bağlı dərin təəssüf hissimizi bildirir, ailəsinə və yaxınlarına başsağlığı veririk. Araşdırma prosesi davam edir”.
TƏBİB-dən “Azərbaycan müəllimi”nin sorğusuna cavab olaraq bildirilib ki, 27.11.2025-ci il tarixində saat 11:12-də Respublika Təcili və Təxirəsalınmaz Tibbi Yardım Mərkəzinə Masazır ərazisindən şəxsin ürəyinin getməsi səbəbilə çağırış daxil olub:
“Saat 11:19-da çağırış ünvanına təcili tibbi yardım briqadası çatıb. Təcili tibbi yardım briqadası tərəfindən 2018-ci il təvvəllüdlü şəxsin (kişi) həkiməqədər ölüm faktı qeydə alınıb”.