Gəncə Şəhər İcra Hakimiyyəti, AMEA-nın Gəncə Bölməsi, Azərbaycan Respublikasının İnsan Hüquqları üzrə Müvəkkilinin (Ombudsmanın) Qərb Regional Mərkəzi və Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin təşkilatçılığı ilə “Tarix və mədəniyyət abidələrinin qorunması” mövzusunda dəyirmi masa təşkil edilib. Tədbir Azərbaycan Respublikasında 2025-ci ilin “Konstitusiya və Suverenlik İli” elan edilməsi haqqında Azərbaycan Respublikası Prezidentinin Sərəncamı çərçivəsində baş tutub.
Əvvəlcə Ulu Öndər Heydər Əliyevin, həmçinin Azərbaycanın müstəqilliyi, suverenliyi və ərazi bütövlüyü uğrunda canından keçən şəhidlərin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
AMEA-nın Rəyasət Heyətinin üzvü, Gəncə Bölməsinin sədri, akademik Fuad Əliyev çıxış edərək bildirib ki, müzakirə olunacaq mövzular elmi və işgüzar əhəmiyyət kəsb etdiyindən tədbir tədqiqatçılar, eləcə də müvafiq sahədə fəaliyyət göstərən mütəxəssislər üçün faydalı olacaqdır. O, həmçinin şəhərin tarixinə və mədəniyyətinə aid abidələrin qorunmasının elmi təminatı, onların qeydiyyatının, muzeylərdə olan eksponat və fondların dəqiqləşdirilməsinin vacibliyi barədə də danışıb.
Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov çıxış edərək Gəncə şəhərinin mədəni irsinin qorunmasının vəziyyəti barədə tədbir iştirakçılarına məlumat verib. O, tarix və mədəniyyət abidələrinin qorunması və bərpasının dövlət siyasətinin tərkib hissəsi olduğuna diqqət çəkib, tədbirdə aidiyyəti dövlət qurumlarının təmsilçilərinin iştirakının bu sahədəki aktual məsələlərin həllinə kömək edəcəyinə inandığını qeyd edib.
Tədbirin davamında “Nizami Gəncəvinin məqbərəsinin qorunması və irsinin təbliğində Ulu Öndər Heydər Əliyevin xidmətləri”, “Bəşər sivilizasiyasının Qarabağda erməni vandalizminə məruz qalmış tarix və mədəniyyət abidələri”, “Tarix və mədəniyyət abidələrinin qorunmasının konstitusion təminatları”, “Tarix və mədəniyyət abidələrinin qorunması sahəsində Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin fəaliyyəti” və digər mövzular ətrafında məruzələr dinlənilib.
Daha sonra məruzələr ətrafında müzakirələr aparılıb.
