Gəncə şəhər Məhsəti Gəncəvi Mərkəzində “Şuşa təsviri sənətdə” kitabının təqdimatı keçirilib. Tədbirdə Gəncə Şəhər İcra Hakimiyyətinin rəsmisi, Gəncə-Daşkəsən Regional Mədəniyyət İdarəsinin nümayəndələri, həmçinin Azərbaycan Rəssamlar İttifaqının üzvləri iştirak ediblər.
Əvvəlcə Azərbaycanın müstəqilliyi, suverenliyi və ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Daha sonra tədbir iştirakçılarına “Şuşa təsviri sənətdə” kitabı ilə bağlı ətraflı məlumat verilib.
Qeyd olunub ki, Şuşa təkcə Azərbaycan tarixinin və musiqisinin deyil, həm də təsviri sənətin ən mühüm mövzularından biridir. Şəhərin möhtəşəm təbiəti – dağlar, dərələr, çaylar, həmçinin qədim qala divarları, məscidlər, məhəllələr və memarlıq abidələri rəssamlar üçün hər zaman ilham mənbəyi olub. Şuşanın mənzərələri Azərbaycan təsviri sənətində “dağ şəhəri”, “qaya üzərində qala” obrazı ilə xüsusi yer tutur. 20-ci əsrin əvvəllərindən etibarən bir çox azərbaycanlı rəssam Şuşanın təsvirinə müraciət edib. Bildirildi ki, sözügedən kitaba Gəncə şəhərində yaşayıb yaradan rəssamların da əsərləri daxil edilib.
Çıxışlardan sonra Azərbaycan Rəssamlar İttifaqına üzv seçilmiş gənc rəssamlara vəsiqələri tədqim olunub, onlara gələcək fəaliyyətlərində uğurlar arzulanıb.