“Bu layihəni mümkün edən bütün tərəfdaşlara, bütün sponsorlara – İqtisadiyyat Nazirliyinə, SOCAR-a, PAŞA-ya və ilk gündən bizimlə birlikdə çalışan, bu gün müzakirə etdiyimiz məsələləri müzakirə etməyimizə imkan yaradan bütün digər maraqlı tərəflərə təşəkkür etmək istəyirəm”.
Bu fikirləri “SABAH.city” innovasiya şəhərciyində Azərbaycan Respublikasının elm və təhsil naziri Emin Əmrullayev bildirdi.
O vurğuladı ki, rəqəmsal bacarıqlar və ya ümumilikdə insan bacarıqlarda əsas və fundamental tərəf çox vacibdir:
“Çünki bəzən düşünürəm ki, bir çox sistemlər addım-addım inkişaf etmək əvəzinə, müəyyən tendensiyalara uyğunlaşmağa və onları yaxalamağa çalışırlar. Bununla bağlı iki yanaşma var. Birincisi, daha uzun yoldur. Bu yanaşmaya görə, müəyyən sistemlərin və ya iqtisadiyyatların onilliklər ərzində keçdiyi məsafəni beş və ya on il ərzində qət etmək mümkün deyil. Digər tərəfdən isə qısa yollar və ya sürətli nəticələr axtarmaq olar. Bu da ən azı qarşılaşdığınız müəyyən çətinlikləri həll etməyə imkan verə bilər. Düşünürəm ki, bu, daim müzakirə olunan məsələdir və bu gün burada tərəf olduğumuz üçün şadam.
Cavab isə həmişə hər ikisidir. Bir tərəfdən, əgər yalnız uzunmüddətli yanaşmaya fokuslansanız, gözlənilməz qeyri-müəyyənlikləri həll etmək imkanınızı itirə bilərsiniz. Qarşılaşa biləcəyiniz və əvvəlcədən görə bilmədiyiniz problemləri həll etmək üçün müəyyən istedadlara və layihələrə, məsələn, 5-10 faizlik resursa ehtiyacınız ola bilər. Digər tərəfdən, əgər çoxlu qısamüddətli layihələrə və sürətli nəticələrə fokuslansanız, uzunmüddətli perspektivdə yenə də dərin problemləriniz qala bilər. Daha mürəkkəb məsələləri həll etməkdə çətinlik çəkə və nəticədə geridə qala bilərsiniz. Məhz biz də bunu etməyə çalışırıq. Düşünürəm ki, son 10 ildən artıq müddətdə Azərbaycanın təhsil sistemi bu iki yanaşma arasında balans yaratmağa çalışıb. Bir tərəfdən çox güclü pilot yanaşmamız var. Yəni bütün sistem üzrə bunu həyata keçirə bilmiriksə, heç olmasa bunu edə bildiyimiz yerlərdə tətbiq edək. Eyni zamanda nəzərə alırıq ki, PISA, PIRLS, TIMSS və digər beynəlxalq qiymətləndirmələrdə nəticələrimizi yaxşılaşdırmalıyıq”.