18 sentyabr – Milli Musiqi Günü münasibətilə, dahi bəstəkar Üzeyir Hacıbəylinin anadan olmasının 141-ci ildönümü və Üzeyir Hacıbəyli XVII Beynəlxalq Musiqi Festivalı çərçivəsində Fikrət Əmirov adına Gəncə Dövlət Filarmoniyasında Üzeyir Hacıbəylinin yaradıcılığına həsr olunmuş konsert proqramı keçirilib.
Fikrət Əmirov adına Gəncə Dövlət Filarmoniyasının Kamera Orkestrinin təqdim etdiyi konsert proqramında Azərbaycan professional musiqi sənətinin banisi, dahi bəstəkar Üzeyir Hacıbəylinin zəngin yaradıcılıq irsindən nümunələr səsləndirilib. Konsertdə Gəncə Dövlət Filarmoniyasının rəqs kollektivi də çıxış edib.
Konsert proqramı Üzeyir Hacıbəylinin zəngin yaradıcılıq irsinin təbliğinə, Azərbaycan professional musiqisinin inkişafında onun müstəsna rolunun bir daha nümayiş etdirilməsinə və milli musiqi ənənələrinin yaşadılmasına xidmət edib.
Səsləndirilən əsərlər və kollektivlərin çıxışları tamaşaçılar tərəfindən böyük alqışlarla qarşılanıb.