İspaniyanın Las-Palmas-de-Qran-Kanariya şəhərində yeniyetmələr arasında keçirilən cüdo üzrə Avropa çempionatında Gəncə idmançıları uğurlu çıxış ediblər.
“Təhsil” RİM PHŞ Gəncə şəhər 1 nömrəli UGİŞM PHŞ-in yetirməsi Sadiq Məmmədov (73 kq, şəxsi məşqçi Samir İsmayılov) gümüş, İlkin Qarayev (66 kq, şəxsi məşqçi Hüseyn Allahverdiyev) isə bürünc medal qazanaraq Azərbaycan milli komandasının uğuruna töhfə veriblər.
Bu münasibətlə Heydər Əliyev Park-Xiyaban Kompleksindəki Zəfər Tağının önündə Sadiq Məmmədovun qarşılanma mərasimi keçirilib. Mərasimdə iştirak edən idman ictimaiyyətinin nümayəndələri cüdoçuları əldə etdikləri uğur münasibətilə təbrik edib, onlara gələcək yarışlarda yeni nailiyyətlər arzulayıblar.Məşqçilər və idmançıların valideynləri göstərilən diqqətə görə təşəkkürlərini bildiriblər.
Qeyd edək ki, bürünc medalçı İlkin Qarayev son beynəlxalq yarışda aldığı zədə səbəbindən Bakı şəhərində müalicə aldığı üçün qarşılanma mərasimində iştirak edə bilməyib.
Sonda xatirə şəkli çəkdirilib.
