18-19 İyul 2026-cı il tarixlərində Azərbaycan Karate Federasiyası və Azərbaycan Respublikasının Gənclər və İdman Nazirliyinin birgə təşkilatçılığı ilə Gəncə İdman Sarayında “Olimpiya Ümidləri” beynəlxalq karate turniri baş tutub.
Turnirin açılış mərasimində Gəncə Şəhər İcra Hakimiyyətinin başçısı Niyazi Bayramov, Azərbaycan Karate Federasiyasının prezidenti, Milli Məclisin deputatı Ülvi Quliyev, Milli Məclisin deputatları Pərvin Kərimzadə və Müşfiq Cəfərov, Federasiyanın vitse-prezidenti Fizuli Musayev, Gəncə-Daşkəsən Regional Gənclər və İdman İdarəsinin rəisi Elşən Hüseynov, idarə, müəssisə və təşkilat rəhbərləri, şəhid ailələrinin üzvləri, müharibə iştirakçıları və idman ictimaiyyətinin nümayəndələri iştirak ediblər.
Əvvəlcə Azərbaycan Respublikasının Dövlət Himni səsləndirilib, Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad olunub.
Çıxış edən rəsmilər ölkədə Prezident İlham Əliyevin və Birinci vitse-prezident Mehriban xanım Əliyevanın idman sahəsinə göstərdiyi yüksək diqqət və qayğıdan bəhs ediblər. Qeyd olunub ki, məhz bu dövlət qayğısının nəticəsidir ki, Azərbaycan idmançıları beynəlxalq arenalarda uğurla çıxış edərək dövlət bayrağımızı qürurla ucaldır, ölkəmizi layiqincə təmsil edirlər.
Çıxışlardan sonra Azərbaycan Karate Federasiyasının təsis etdiyi xüsusi diplomların təqdimetmə mərasimi də keçirilib.
Gəncə Şəhər İcra Hakimiyyətinin başçısı Niyazi Bayramov və Gəncə-Daşkəsən Regional Gənclər və İdman İdarəsinin rəisi Elşən Hüseynov turnirin yüksək səviyyədə təşkilinə göstərdikləri dəstəyə və ölkədə idmanın inkişafına verdikləri töhfəyə görə Azərbaycan Karate Federasiyasının xüsusi diplomları ilə təltif olunublar.
Həmçinin Milli Məclisin deputatları Pərvin Kərimzadə və Müşfiq Cəfərov, eləcə də Gəncə İdman Sarayının baş direktoru Hafiz Mustafayev Azərbaycan Karate Federasiyasının xüsusi diplomlarına layiq görülüblər.
Tədbir çərçivəsində şəhid ailələrinin üzvləri Nailə Ələkbərova və Elxan Əliyev, eləcə də turnirdə iştirak edən müharibə iştirakçıları Sahib Mirzəyev, Bəxtiyar Feyruzi və Emil Abdıyev də Azərbaycan Karate Federasiyasının xüsusi diplomları ilə təltif olunublar.
Daha sonra turnirə start verilib. Yarışlarda Azərbaycanın müxtəlif bölgələrindən olan karateçilərlə yanaşı, Türkiyə, Pakistan, Gürcüstan və Rumıniyanı təmsil edən komandaların ümumilikdə 600 idmançısı mübarizə aparıb.
Turniri yerli və xarici mütəxəssislərdən ibarət 32 nəfərlik hakimlər heyəti idarə edib. Hakimlər heyətində 12 beynəlxalq dərəcəli hakim təmsil olunub.
İki gün davam edən turnirdə müxtəlif yaş və çəki kateqoriyaları üzrə qarşılaşmalar keçirilib, qaliblər müəyyənləşdirilərək müvafiq medallar və diplomlarla təltif olunublar.
Qeyd edək ki, “Olimpiya Ümidləri” beynəlxalq karate turniri ölkəmizdə karatenin inkişafına, yeniyetmə və gənclərin vətənpərvərlik ruhunda, yüksək mənəvi dəyərlərə sadiq şəkildə yetişdirilməsinə, perspektivli idmançıların aşkara çıxarılmasına və beynəlxalq idman əməkdaşlığının daha da genişləndirilməsinə xidmət edir.
