İlham Əliyevin Avropa çempionatında komanda hesabında çempion olan güləşçiləri qəbul etməsi Azərbaycan idmanının qazandığı böyük uğurun dövlət səviyyəsində yüksək qiymətləndirilməsinin göstəricisidir. Prezidentin səsləndirdiyi “Bizim bayrağımız qaldırılanda bütün Azərbaycan xalqı qürur hissi keçirir, sevinir” fikri bu qələbənin təkcə idman uğuru deyil, həm də milli qürur və həmrəylik mənbəyi olduğunu vurğulayır.
Güləş üzrə Avropa çempionatında əldə olunan komanda birinciliyi Azərbaycan idmançılarının peşəkarlığını və əzmkarlığını bir daha sübut edir. Yarışlar zamanı qazanılan qələbələr nəticəsində dövlət bayrağımızın yüksəldilməsi və himnimizin səsləndirilməsi hər bir azərbaycanlı üçün qürurverici anlar yaşadır. Bu cür uğurlar milli kimliyin güclənməsinə və vətənpərvərlik hisslərinin artmasına mühüm təsir göstərir.
Prezident İlham Əliyevin idmançılarla görüşü zamanı onların zəhməti və nailiyyətləri yüksək qiymətləndirilmiş, gələcəkdə daha böyük uğurlar qazanacaqlarına inam ifadə olunmuşdur. Bu diqqət və qayğı idmançılar üçün güclü motivasiya rolunu oynayır, gənc nəslin idmana marağını artırır və onları sağlam həyat tərzinə təşviq edir.
Azərbaycan dövləti idmanın inkişafına xüsusi önəm verir. Müasir idman infrastrukturu, beynəlxalq yarışların təşkili və idmançılara göstərilən dəstək ölkəmizin bu sahədə uğurlarının əsasını təşkil edir. Bu siyasətin nəticəsində Azərbaycan idmançıları beynəlxalq arenada ölkəmizi uğurla təmsil edərək bayrağımızı yüksəklərə qaldırırlar.
Cümşüdov Abuzər
Gəncə şəhəri İdman Liseyinin Təlim tərbiyə işlər üzrə direktor müavini