Artıq bildiyimiz kimi Gəncə İdman Liseyinin direktoru, “Fəxri Bədən Tərbiyəsi və İdman işçisi”, “İdman ustası”, “Tərəqqi” medallı, Əməkdar məşqçi Mehman Allahverdiyev Azərbaycan Güləş Federasiyasının Qazax-Tovuz (Qazax, Ağstafa, Gədəbəy, Tovuz, Şəmkir) bölgəsi üzrə regional güləş koordinatoru təyin edilib. Bu münasibətlə Mehman müəllimi adımızdan təbrik edir, gələcək işlərində uğurlar arzu edirik!
Yeni təyinatı ilə bağlı onunla apardığımız söhbəti sizlərə təqdim edirik:
-Mehman müəllim, ilk öncə sizi Azərbaycan Güləş Federasiyasının Qazax- Tovuz bölgəsi üzrə regional güləş koordinatoru təyin edildiyiniz münasibətilə təbrik edirik. Ümid edirik ki, məhz sizin başçılığınız altında bölgədə güləşin daha da inkişaf etdirilməsində böyük yenilikliklərə imza atılacaqdır..Bir neçə gün bundan öncə mətbuatda Azərbaycan Güləş Federasiyasının (AGF) regional güləş koordinatorları ilə keçirdiyi görüş barədə məlumatlar paylaşıldı. Sevindirici haldır ki, bu görüşdə siz də iştirak edirdiniz. Bu yəqin ki, davamlı inkişafa təkan verəcək, həmçinin güləşin kütləviliyinin artırılması və regionlarda davamlı irəliləyişin təmin edilməsində böyük təsir göstərəcəkdir.
-Artıq bildiyiniz kimi ölkənin coğrafi-iqtisadi bölgüsünə uyğun olaraq, 14 regional nümayəndəlik formalaşdırılıb. İki gün davam edən görüşdə regional koordinatorların vəzifə öhdəlikləri, fəaliyyət planları, regionlarda güləşin inkişaf strategiyası və mövcud çətinliklər müzakirə olundu. İştirakçılar arasında fikir mübadiləsi aparıldı, irəli sürülən təkliflər dəyərləndirildi. Proqram çərçivəsində koordinatorlara AGF-nin strukturu və strategiyası, regional inkişaf istiqamətləri, vahid təqvim planı, yarışların təşkili və onlayn məlumat bazasının fəaliyyəti barədə təqdimatlar keçirildi. Görüşün ilk günündə federasiyanın strategiyası və regional inkişaf planı təqdim olundu. Daha sonra regionların inkişaf istiqamətləri üzrə qrup işi aparıldı, prioritetlər müəyyənləşdirildi və qarşıdakı dövr üçün fəaliyyət planları müzakirə edildi.
Proqramın ikinci günündə vahid təqvim planı, yarışların təşkili, onlayn məlumat bazasından istifadə, eləcə də sənəd və şablonlarla iş qaydaları barədə məlumat verildi. Regional koordinatorların fəaliyyətinin planlaşdırılması və hesabatlılıq mexanizmləri də nəzərdən keçirildi.
-Görüşün əsas məqsədi nə idi?
-Görüşün əsas məqsədi regional fəaliyyətin koordinasiyasını gücləndirmək, idarəetmədə vahid yanaşmanı təmin etmək və ölkədə güləşin davamlı inkişafına töhfə vermək idi. Tədbir həmçinin koordinatorlar arasında təcrübə mübadiləsinin və əməkdaşlığın genişləndirilməsinə xidmət edirdi. Görüşdə həmçinin Regional Koordinatorların vəzifə öhdəlikləri barədə də məlumatlar aldıq.
-Fəaliyyətin koordinasiyası dedikdə ilk öncə nələr nəzərdə tutulur?
-Burada ilk öncə regionlarda güləş idman növü üzrə işlərin mərkəzi federasiya ilə əlaqəli şəkildə idarə olunması nəzərdə tutulur.Burada həmçinin vahid idarəetmə və yanaşma, yerli qurumlar arasında idarəetmədə vahid standartların və qaydaların tətbiqi ön plana çəkilir. Yarışların təşkili – bölgələrdə yerli təqvim planına uyğun turnirlərin və yarışların yüksək səviyyədə keçirilməsinin təmin edilməsi, məlumat bazası və hesabatlılıq – onlayn məlumat bazasının idarə olunması, rəsmi sənəd və şablonlardan istifadə qaydalarına əməl edilməsi, müntəzəm hesabatların verilməsi, istedadların aşkarlanması – regionlarda gənc və istedadlı idmançıların üzə çıxarılması və onlara dəstək göstərilməsi işin əsas qayəsini təşkil edir.
-Bütün bunlar yəqin ki, sizin fəaliyyət planında nəzərdə tutulmuşdur.
–Fəaliyyət planlarımız geniş və əhatəlidir. Bu işdə bizdə vahid təqvim planı hazırlanmışdır. Bu da yerli yarışların respublika təqvim planı ilə uzlaşdırılmasına xidmət edəcəkdir. Qrup işləri və prioritetlərə gəldikdə isə koordinatorların komandalara bölünərək hər bir bölgənin spesifik ehtiyaclarına uyğun fəaliyyət planları hazırlaması nəzərdə tutulur. Bundan başqa təcrübə mübadiləsi işimizdə böyük önəm daşımaqdadır. Koordinatorlar arasında mütəmadi fikir mübadiləsi, seminar və görüşlər təşkil ediləcəkdir.
-Regionlarda Güləşin İnkişaf Strategiyasında daha hansı işlər nəzərdə tutulmuşdur?
–Güləşin kütləviliyinin artırılması və regionlarda davamlı irəliləyişin təmin edilməsi üçün davamlı inkişafı təmin etmək, elm və təhsil əməkdaşlığı, Azərbaycan Güləş Federasiyası vədigər tərəfdaş qurumlarla birgə mütəxəssis, məşqçi və hakim hazırlığının gücləndirilməsi, mövcud çətinliklərin aradan qaldırılması, bölgələrdəki infrastruktur və təşkilati çətinliklərin təhlil edilərək həlli istiqamətində təkliflərin dəyərləndirilməsi perspektiv planlarımıza aiddir.
-Dəyərli müsahibə üçün təşəkkürümüzü bildiririk.
Ruhulla Zahidov, yazıçı-jurnalist.
Gəncə
