Belarus Respublikası Milli Assambleyası Nümayəndələr Palatasının sədri İqor Serqeyenkonun rəhbərlik etdiyi nümayəndə heyəti Gəncə şəhərində səfərdə olub.
Nümayəndə heyətinin tərkibində Belarus Respublikasının Azərbaycan Respublikasındakı fövqəladə və səlahiyyətli səfiri Dmitri Pineviç, Belarus Respublikası Milli Məclisinin Nümayəndələr Palatası sədrinin fəaliyyətinin planlaşdırılması və təminatı şöbəsinin rəisi Aleksandr Antonoviç, eləcə də Belarus Respublikasının Azərbaycan Respublikasındakı səfirliyinin birinci katibi Veronika Aleksandrovna Lisitskaya yer alıblar.
Qonaqları Gəncə Şəhər İcra Hakimiyyətinin başçısı Niyazi Bayramov və Milli Məclisin deputatı Xanlar Fətiyev qarşılayıblar.
Səfər çərçivəsində nümayəndə heyətinin üzvləri əvvəlcə Gəncənin mərkəzi meydanında Ulu Öndər Heydər Əliyevin abidəsini ziyarət edib, abidənin önünə gül dəstələri düzüblər.
Daha sonra qonaqlar Ermənistan silahlı qüvvələri tərəfindən törədilən mülki cinayətləri əks etdirən Gəncə Memorial Kompleksini ziyarət ediblər. Nümayəndə heyətinin üzvləri kompleksin önünə gül dəstələri düzərək şəhidlərin əziz xatirəsini ehtiramla yad ediblər. Qonaqlar, həmçinin memorial kompleksin ərazisində yaradılmış muzeylə tanış olub, burada nümayiş etdirilən eksponatlara baxış keçiriblər.
Şəhər gəzintisi zamanı nümayəndə heyətinin üzvləri Gəncənin sonuncu xanı Cavad xanın məqbərəsində və onun adını daşıyan küçədə olublar.
