Noyabrın 1-də Gənclər və İdman Nazirliyinin təşkilatçılığı ilə VI “Qələbə qaçışı” xeyriyyə tədbiri keçiriləcək. Azərbaycanın Vətən müharibəsində qazandığı möhtəşəm Zəfərə həsr olunmuş və “Qürurla irəli!” şüarı altında təşkil olunacaq.
“Qələbə qaçışı”nın iştirakçıları Dənizkənarı Milli Parkda, “Yeddi gözəl” fəvvarəsinin yanından start götürəcəklər. 10 kilometr məsafəni əhatə edəcək qaçış saat 10:00-da başlayacaq. Finiş xəttini ilk keçən iştirakçılar qalib elan edilərək mükafatlandırılacaqlar.
Oktyabrın 31-də isə tədbir ərazisində fan-zona fəaliyyət göstərəcək. Burada qonaqlar üçün müxtəlif əyləncələr və maraqlı proqramlar təqdim olunacaq.
Qaçışda 16 yaşdan yuxarı şəxslər iştirak edə bilərlər. Qeydiyyatdan keçmək üçün https://events.smartscoring.com/marathon#form vasitəsilə müraciət etmək mümkündür. Yerlər məhdud olduğundan iştirakçı sayı müəyyən edilmiş limitə çatdıqda qeydiyyat avtomatik olaraq dayandırılacaq. İştirak üçün qeydiyyat zamanı 20 manat ianə ödənilməlidir. Toplanan vəsait “YAŞAT” Fonduna köçürüləcək.
Müraciəti qəbul edilmiş iştirakçıların mobil telefon nömrəsinə SMS və elektron poçt ünvanına təsdiq məktubu göndəriləcək. Qeydiyyatdan keçmiş iştirakçılar 18-30 oktyabr tarixlərində, iş günləri (şənbə və bazar istisna olmaqla) saat 09:00-dan 18:00-dək “BEGOC Plaza”da (Z.Əliyeva küçəsi 93) SMS-i təqdim etməklə iştirakçı nömrələrini əldə edə biləcəklər.
Ətraflı məlumat üçün +994 12 404 13 93 nömrəli çağrı mərkəzinə hər gün saat 10:00-dan 18:00-dək müraciət edə bilərsiniz.