YAP Gəncə şəhər təşkilatında Yeni Azərbaycan Partiyasının VIII Qurultayında Prezident İlham Əliyevin çıxışından irəli gələn vəzifələrə həsr olunmuş tədbir keçirilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Ulu Öndər Heydər Əliyevin, eləcə də Azərbaycanın müstəqilliyi, suverenliyi və ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Daha sonra Yeni Azərbaycan Partiyasının fəaliyyətinə və VIII Qurultayına həsr olunmuş videoçarx nümayiş etdirilib.
Tədbirdə çıxış edən YAP İdarə Heyətinin üzvü, YAP Gəncə şəhər təşkilatının sədri Bayram Aslanov Yeni Azərbaycan Partiyasının ölkənin sürətli inkişafında, beynəlxalq nüfuzunun yüksəlməsində və müxtəlif sahələrdə əldə olunan nailiyyətlərdə mühüm rolundan danışıb.
Bayram Aslanov bildirib ki, YAP-ın VIII Qurultayı Azərbaycanın ictimai-siyasi həyatında mühüm hadisədir. Onun sözlərinə görə, Ulu Öndər Heydər Əliyevin ideyalarına sadiq olan və Prezident İlham Əliyevin ətrafında sıx birləşən partiya üzvləri bundan sonra da qarşıya qoyulan strateji vəzifələrin həyata keçirilməsində fəal iştirak edəcəklər.
Qeyd olunub ki, Yeni Azərbaycan Partiyasının tarixi müasir Azərbaycan dövlətinin tarixinin ayrılmaz hissəsidir. Bu tarix mühüm Zəfərlərlə zəngindir və qarşıdakı illərdə də yeni uğurlarla davam etdiriləcək.
Milli Məclisin deputatı Müşfiq Cəfərov çıxışında Azərbaycanın öz gücünə, xalqın iradəsinə və dövlətçilik ənənələrinə arxalanaraq gələcəyə inamla addımladığını bildirib. O qeyd edib ki, Ulu Öndər Heydər Əliyevin müəyyən etdiyi siyasi kurs Prezident İlham Əliyevin rəhbərliyi ilə yeni məzmun və hədəflərlə davam etdirilir.
Deputat Azərbaycanın ərazi bütövlüyünün və suverenliyinin bərpasının həyata keçirilən siyasi kursun ən mühüm nəticələrindən biri olduğunu vurğulayıb. Bildirib ki, qarşıdakı əsas vəzifələr əldə edilmiş Zəfərlərin qorunması, dövlətin gücünün daha da artırılması, iqtisadi inkişafın sürətləndirilməsi, Azərbaycanın beynəlxalq mövqelərinin möhkəmləndirilməsi və xalqın rifahının yüksəldilməsidir.
Azərbaycan Dövlət Aqrar Universitetinin rektoru Zəfər Qurbanov çıxışında Yeni Azərbaycan Partiyasının Ulu Öndər Heydər Əliyevin etimadını doğruldaraq dünənin, bu günün və gələcəyin partiyası olduğunu qeyd edib. O bildirib ki, partiyanın ən böyük uğurlarından biri xalqın sevgisini, etimadını və inamını qazanmasıdır. Bunun əsas səbəblərindən biri isə YAP-ın söz və əməl birliyinə sadiqliyidir.
1 saylı Uşaq-Gənclər Şahmat İdman Məktəbinin direktoru, Paralimpiya çempionu Ramil Qasımov Prezident İlham Əliyevin YAP-ın VIII Qurultayında çıxışının Azərbaycanın dünəni, bu günü və gələcəyi ilə bağlı mühüm siyasi baxışları özündə əks etdirdiyini vurğulayıb.
Azərbaycan Dövlət Aqrar Universitetinin baş müəllimi, VIII Qurultayın nümayəndəsi Türkan Əhmədova isə Yeni Azərbaycan Partiyasının tarixinin Azərbaycanın müstəqillik tarixi, dövlətçilik ənənələri və xalqın gələcəyə inamı ilə sıx bağlı olduğunu bildirib. O, ölkənin qazandığı uğurların qorunması və yeni nailiyyətlərin əldə olunması üçün milli həmrəyliyin, dövlətçilik düşüncəsinin və gələcəyə inamın bundan sonra da mühüm amillər olacağını qeyd edib.
Sonda Yeni Azərbaycan Partiyasının Himni səsləndirilib.
