27 Sentyabr – Anım Günü ilə əlaqədar olaraq Gəncə Dövlət Milli Dram Teatrının rəhbərliyi və yaradıcı kollektivi şəhidlərin əziz xatirəsini ehtiramla yad edib. Teatrın rəhbərliyi, aktyor heyəti və əməkdaşları Gəncə şəhərində yerləşən Şəhidlər xiyabanını ziyarət edərək Vətənimizin ərazi bütövlüyü və suverenliyi uğrunda canından keçmiş şəhidlərin məzarları önünə gül dəstələri düzüb, onların əziz xatirəsini dərin hörmət və ehtiramla anıblar.
Anım Günü çərçivəsində Gəncə Dövlət Milli Dram Teatrında gənc yazar Vaqif Əmiraslanın qələmə aldığı “Gülüstan” pyesi əsasında hazırlanmış tamaşa da nümayiş olunub.
“Gülüstan” tamaşasının nümayişi ilə teatr kollektivi milli-mənəvi dəyərlərimizin, Vətən sevgisinin və şəhidlərimizin qəhrəmanlıq irsinin səhnə sənəti vasitəsilə təbliğinə öz töhfəsini verib.
Tamaşanın quruluşçu rejissor Fuad Cavadzadə, quruluşçu rəssamı Mirzə Mehdi Hüseynov, bəstəkarı Svetlana Hüseynova, Xoeroqrafı Sənan Cavadov, qrafik üzrə Sübhan Hüseynov, hərbi səhnələrun qurulmasına görə məsləhətçisi isə, teatrın aktyoru, 44 günlük Vətən müharibəsinin iştirakçısı Şahmar Məmmədovdur.
Tamaşada əsas obrazları Ramiz Vəliyev (Əməkdar artist), Novruz Cəfərov (Əməkdar artist), Kəmalə Məmmədova (Əməkdar artist), Zülfiyyə Əliyeva, Emil Salmanov, Zeynəb Hüseynova, Samir Abbasov, Zəminə Cəfərova, Sevinc Hüseynova, Aysu Kəngərli, Mayan Hüseynova, Rəvan Alıyev, Səma Əlizadə, Şahmar Məmmədov, Ruslan Hüseynov, Fərid Vəliyev, Ümid Orucov, Rauf Hüseynov, Elnur Abbasov, Elmir Məmmədov, Ceyhun Qurbanov, Zaur Əhmədov ifa edirlər.
Tamaşaçıların diqqətinə çatdırılan səhnə əsəri şəhidlərin əziz xatirəsinə ehtiramın ifadəsi olmaqla yanaşı, gənc dramaturqların yaradıcılığının dəstəklənməsi baxımından da əhəmiyyət daşıyır.
Gəncə Dövlət Milli Dram Teatrı bundan sonra da milli-mənəvi dəyərlərin, Vətən sevgisinin, qəhrəmanlıq və fədakarlıq nümunələrinin təbliğinə, eləcə də müasir Azərbaycan dramaturgiyasının inkişafına xidmət edən layihə və tamaşaların hazırlanmasını davam etdirəcək.
Allah bütün şəhidlərimizə rəhmət eləsin!
