“BƏLKƏ ƏLAC EDƏSİZ?!.” – Tanınmış teatrşünas-tənqidçi TƏBİBƏ səsləndi

Gəncə sakini, tanınmiş teatrşünas-tənqidçi Anar Ərtoğrul Burcəliyev Gəncə şəhər 2 nömrəli Birləşmiş Uşaq Xəstəxanasında başına gələnlər haqqında sosial şəbəkədə paylaşım etmişdir. -Başıma gələnlər dəhsətdir, – o bildirir.

Paylaşımı olduğu kimi diqqətinizə çatdırırıq.

-“Gəncənin uşaq Acilində gecə növbəsi: Bir həkim, onlarla xəstə və “Allah kömək olsun” sistemi?

TƏBİB-ə sual: Uşaqların təcili tibbi yardıma ehtiyacı olduğu saatlarda niyə bir həkimə bu qədər yük düşür?

Gəncə şəhər 2 nömrəli Birləşmiş Uşaq Xəstəxanasının Acilində gecə növbəsi ilə bağlı ortaya çıxan vəziyyət ciddi suallar doğurur.

Gecədir. Uşağı xəstələnən valideyn təşviş içində xəstəxanaya gəlir. Acildə xəstələrin sayı artır, gözləyənlərin sayı çoxalır. Amma qarşıda — cəmi bir həkim.

İndi təsəvvür edin: bir həkim eyni vaxtda neçə uşağa baxmalıdır? Bir xəstəni müayinə edir, digəri gözləyir. Birinin temperaturu yüksəkdir, digərinin vəziyyəti daha ağır görünür, başqa bir valideyn isə “uşağımın halı pisləşir” deyə narahatdır.

Bəs bir həkim bunların hamısına necə çatmalıdır?

Yəqin ki, TƏBİB-in növbə planında həkimlərin “super gücə” malik olduğu nəzərə alınıb.

Çünki başqa bir izahlı söz tapmaq çətindir.

Həkim insan deyil, sanki “24 saatlıq tibbi kombayn”dır: həm xəstəni qəbul etsin, həm müayinə etsin, həm sənədləşmə aparsın, həm təcili halları ayırsın, həm də növbədə gözləyənlərin narazılığını dinləsin.

Üstəlik, söhbət uşaqlardan gedir.

Burada əsas məsələ növbədə dayanan həkimi günahlandırmaq deyil. Əksinə, sual yaranır ki, bir həkimin üzərinə niyə bu qədər yük qoyulur?

Əgər gecə saatlarında uşaq Acilinə müraciətlərin sayı yüksəkdirsə, niyə növbədəki tibbi personalın sayı həmin yükə uyğun müəyyənləşdirilmir?

TƏBİB-ə konkret suallar

1. Gəncə şəhər 2 nömrəli Birləşmiş Uşaq Xəstəxanasının Acilində gecə növbəsində neçə həkim nəzərdə tutulur?

2. Faktiki olaraq gecə növbəsində neçə həkim xidmət göstərir?

3. Bir gecə ərzində orta hesabla neçə uşaq Acilə müraciət edir?

4. Bir həkimin gecə ərzində bütün müraciətlərə vaxtında baxması üçün müəyyən edilmiş maksimum xəstə yükü varmı?

5. Xəstə sayının artdığı saatlarda əlavə həkim və ya tibbi personal cəlb olunurmu?

6. Növbə cədvəli real müraciət statistikası əsasında yenidən qiymətləndirilirmi?

Çünki səhiyyədə əsas məqsəd sadəcə “həkim növbədədir” deməklə olmamalıdır.

Əsas məsələ odur ki, xəstə vaxtında həkimə çata bilsin.

Valideyn gecə saat 2-də uşağını qucağına alıb xəstəxanaya gətirirsə, onun gözləntisi çox sadədir: həkim uşağı vaxtında müayinə etsin.

Bu, lüks deyil.

Bu, normal tibbi xidmətə olan ən adi gözləntidir.

TƏBİB isə bəlkə bir dəfə gecə növbəsini kağız üzərində yox, real vəziyyətdə qiymətləndirsin.

Çünki kabinetdə yazılan “1 həkim növbədədir” başqa şeydir, Acilin qapısında növbə gözləyən onlarla uşağın qarşısında “1 həkim hamısına çatmalıdır” başqa şey.

Bir həkimə onlarla xəstə düşürsə, problem həkimin sürətində deyil — sistemin hesablamasındadır.

Və ən vacib sual budur:

TƏBİB, bir həkim neçə uşağa qədər “çatdırmalıdır” ki, sistem bunu artıq normal yox, problem hesab etsin? Hə?..”