2 Fevral – Gənclər Günü münasibətilə Azərbaycan Dövlət Aqrar Universitetində (ADAU) “Gənclik enerjisinin və ağsaqqal müdrikliyinin vəhdəti güclü dövlətin və sağlam cəmiyyətin təminatıdır” mövzusunda regional konfrans təşkil olunub. Tədbir Gəncə Şəhər İcra Hakimiyyətinin dəstəyi, Gəncə Şəhər Ağsaqqallar Şurasının və ADAU-nun birgə təşkilatçılığı ilə baş tutub.
Konfransda Ulu Öndər Heydər Əliyevin və şəhidlərin əziz xatirəsinin bir dəqiqəlik sükutla yad edilməsi ilə başlayıb, ardından Azərbaycan Respublikasının Dövlət Himni səsləndirilib.
Konfransda çıxış edən Gəncə şəhər İcra Hakimiyyətinin sektor müdiri Yadigar Bədəlov gənclərin dövlətçilik ənənələrinə sədaqət ruhunda formalaşdırılmasının mühüm əhəmiyyət daşıdığını vurğulayıb. O, ağsaqqalların zəngin həyat təcrübəsinin gənc nəslin düzgün istiqamətləndirilməsində mühüm rol oynadığını qeyd edib.
Azərbaycan Ağsaqqallar Şurasının sədr müavini Bayram Yusifov çıxışında bildirib ki, gənclik hər bir xalqın gələcəyidir və bu gələcəyin sağlam təməllər üzərində qurulması ağsaqqalların əsas mənəvi missiyalarından biridir. O vurğulayıb ki, gənclərin milli-mənəvi dəyərlərə bağlı, vətənpərvər və məsuliyyətli vətəndaş kimi formalaşmasında ağsaqqalların həyat təcrübəsi və nəsihətləri mühüm rol oynayır. Bayram Yusifov bu kimi tədbirlərin gənclərlə ağsaqqallar arasında qarşılıqlı etimadı və dialoqu gücləndirdiyini qeyd edərək, gənclərə daim öz bilik və bacarıqlarını dövlətin və cəmiyyətin inkişafı naminə səfərbər etməyi tövsiyə edib.
ADAU-nun tədris işləri üzrə prorektoru Əhməd Məlikov çıxışında universitetdə gənclərin intellektual, mənəvi və vətənpərvər ruhda yetişdirilməsinin prioritet istiqamət olduğunu bildirib. O, gənclik enerjisi ilə elmi-pedaqoji təcrübənin vəhdətinin cəmiyyətin davamlı inkişafına mühüm töhfə verdiyini diqqətə çatdırıb.
Gəncə-Daşkəsən Regional Gənclər və İdman İdarəsinin rəisi Elşən Hüseynov gənclərin fiziki və psixoloji sağlamlığının qorunmasının qarşıda duran əsas vəzifələrdən biri olduğunu qeyd edərək, bu istiqamətdə həyata keçirilən layihələr barədə məlumat verib.
Gəncə Ağsaqqallar Şurasının sədri, professor Nurəddin Məmmədov çıxışında ağsaqqallıq institutunun milli-mənəvi dəyərlərin qorunması və gənc nəslə ötürülməsində əvəzsiz rol oynadığını vurğulayıb, bu cür tədbirlərin nəsillərarası dialoqu gücləndirdiyini bildirib.
Tədbirdə həmçinin Gəncə Tibb Kollecinin direktoru Mehman Rzayev, Gəncə şəhər Birləşmiş Xəstəxanasının nümayəndəsi Hadı Hüseynov, şəhid Araz Məmmədovun anası Nigar Məmmədova, Kəlbəcər Ağsaqqallar Şurasının sədri Aqil Məmmədov, Zabit Xəlilov çıxış edərək mövzu ətrafında fikirlərini bölüşüblər.
