Gəncə Şəhər İcra Hakimiyyətində yerli sakinlər üçün sosial xidmətlər barədə maarifləndirmə tədbiri keçirilib. Tədbir Azərbaycan Respublikası Prezidentinin 4059 nömrəli Sərəncamı ilə təsdiq edilmiş “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı”nın 8.4.3-cü bəndinin — əhalinin sosial xidmətlərlə təmin edilməsində ünvanlılığın artırılması məqsədilə mövcud sosial xidmətlər haqqında əhali arasında maarifləndirmə tədbirlərinin həyata keçirilməsi — icrasına uyğun olaraq təşkil olunub.
Tədbirdə Sosial Xidmətlər Agentliyi və Gəncə Şəhər İcra Hakimiyyətinin əməkdaşları vətəndaşlarla görüşərək, mövcud sosial xidmətlər və onlara müraciət qaydaları barədə ətraflı məlumat veriblər. Görüş zamanı iştirakçıların sualları cavablandırılıb, həmçinin tədbirə qatılanlara müvafiq məlumatlandırıcı bukletlər paylanılıb.
