Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyə Respublikasının Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, Azərbaycan Dövlət Aqrar Universitetinin rektoru Zəfər Qurbanov, Mərkəzi Aparatının məsul işçisi Araz Salmanov, Yeni Azərbaycan Partiyasının rayon təşkilatlarının sədrləri, YAP Gəncə şəhər təşkilatının ərazi partiya təşkilatlarının sədrləri, şəhid ailələri, partiya fəalları və gənclər iştirak ediblər.
Əvvəlcə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib, ardınca Azərbaycan Respublikasının Dövlət Himni səsləndirilib. Daha sonra YAP Gəncə şəhər təşkilatının 2025-ci ildəki fəaliyyətinə dair videoçarx nümayiş olunub.
Niyazi Bayramov çıxışında bildirib ki, başa vurmaqda olduğumuz 2025-ci il müstəqil Azərbaycanın tarixində mühüm hadisələrlə yadda qalacaq. Belə ki, bu il ölkəmizdə müstəqil Azərbaycanın ilk milli Konstitusiyasının qəbulunun 30 illiyi və Vətən müharibəsində qazanılmış tarixi Qələbənin 5-ci ildönümü qeyd olunub.
Bayram Aslanov qeyd edib ki, Azərbaycan xalqının milli birliyini, həmrəyliyini və tərəqqisini təcəssüm etdirən Dünya Azərbaycanlılarının Həmrəyliyi Günü hər bir azərbaycanlı üçün inam və ümid rəmzidir. O bildirib ki, Ulu Öndər Heydər Əliyevin təşəbbüsü ilə təsis edilən bu əlamətdar gün xalqımızın ideoloji birliyinin möhkəmlənməsində mühüm rol oynayıb.
Araz Salmanov çıxışında dahi şəxsiyyət Heydər Əliyevin siyasi kursunu uğurla davam etdirən Prezident İlham Əliyevin dünya azərbaycanlılarının birliyinin möhkəmləndirilməsi istiqamətində həyata keçirdiyi ardıcıl və məqsədyönlü siyasətin xalqımız tərəfindən daim dəstəkləndiyini bildirib. Onun sözlərinə görə, bu siyasət nəticəsində dünya azərbaycanlılarının həmrəyliyi daha da güclənib.
Yeni Azərbaycan Partiyası Şəmkir rayon təşkilatının sədri Fəxrəddin Vəliyev 31 Dekabr – Dünya Azərbaycanlılarının Həmrəyliyi Gününün ideoloji-siyasi əhəmiyyətindən bəhs edərək bildirib ki, bu günün əsasları Ümummilli Lider Heydər Əliyevin formalaşdırdığı azərbaycançılıq ideologiyasına söykənir və milli yaddaşımızda xüsusi yer tutur.
Çıxışlardan sonra YAP Gəncə şəhər təşkilatının fəallarına təşəkkürnamələr və hədiyyələr təqdim olunub.
Tədbirin rəsmi hissəsi Yeni Azərbaycan Partiyasının Himninin səsləndirilməsi ilə başa çatıb.
Daha sonra Gəncə Dövlət Universitetinin nəzdində Regional Kollecin “Mədəniyyət və incəsənət” şöbəsinin “Qəmbər Hüseynli” instrumental ansamblının ifasında konsert proqramı təqdim edilib.
Tədbir xatirə şəkillərinin çəkdirilməsi ilə yekunlaşıb.
