Gəncə Dövlət Universiteti mənim üçün hər zaman doğma olmuşdur. Atam bu təhsil ocağında 30 il müddətində çalışıb və hələ də adı hörmətlə çəkilir. Orada işləyən alimlərin hər biri mənim üçün əzizdir. Çünki onların böyük hissəsini atam kimi elm cəfakeşi və elm fədaisi sayıram. Bu səbəbdən GDU haqqında yazılan bütün məlumatları diqqətlə izləyir, özlüyümdə analiz edirəm. Bu, məndə artıq bir xobbiyə çevrilmişdir. Bir çoxunda kobud jurnalist səhvləri “göz oxşayır”. Hər bir tənqidi yazı bir insan taleyi deməkdir. Qəribəsi odur ki, jurnalistlər arasında insan taleyinə biganə olan, kimisə əzməkdən, alçatmaqdan sözün həqiqi mənasında həzz alan bir zümrə yetişməkdədir.
Jurnalistika fakültəsində təhsil alarkən müəllimlərimiz bizə öyrədirdi:-Hər bir yazı canlı orqanizm kimidir. Bütün orqanlar yerində çalışmalıdır (yəni yazılarda mövzudan kənara çıxmaq yolverilməzdir). Amma müasir jurnalistlərin yazılarında “orqan” sözü hərfi mənasında nəzərdə tutulur. ..
Qarşımıza GDU-nun Pedaqoji fakültəsinin bir tələbəsinin faciəli ölümü barədə yazılar çıxıb. Bircə tələbə Eltac Əliyevin faciəli ölümü xəbərindən başqa yazılarda sadalanan bütün faktlar təhrif olunmuş, GDU-nun rəhbərliyinin adına böhtan, yaxud yoxlanılmamış, dəqiqləşdirilməmiş, araşdırılmamış əsassız fikirlər söylənilmişdir.
Əlbəttə ki, soruşula bilinər – olan faktı necə danmaq olar?
Bəs fakt nədir və onu yazarlar necə təqdim edir?
Fakt (lat. factum – “baş vermiş”, “olmuş”) – reallığın təsdiq forması və ya həqiqi informasiyadır. Fakt anlayışı müxtəlif elmlərdə insan fəaliyyətinə uyğun olaraq müxtəlif formalarda qəbul edilir. Cəmiyyətdə “fakt” dedikdə “həqiqət”in bir hissəsi başa düşülür. Faktların qəbuluna bəzən konkret şərait və psixologiya təsir edir. İnsanlar bir qayda olaraq gördüklərini və ya eşitdiklərini fakt kimi qəbul edirlər.
Demək fakt nəticə çıxarmaq və təsdiq etmək üçün əsas olan hadisədir. Bununla belə insanın qəbul etdiyi “modelə” sığışmayan reallıqlar situasiyadan asılı olaraq istər-istəməz fakt kimi diqqəti cəlb edə bilər. Haqqında yazılan bu hadisə barədə yürüdülən fikirlər tamam başqa istiqamətə yönəldilməli, bu hadisənin törənmə səbəbləri araşdırılmalı idi.
Yazılarda fakt kimi oxuculara sırınan “tələbə aylığa çıxarılıb”, “ayda 700 manat haqq ödəyirmiş” kimi sərsəmlik ifadə olunan yazılar jurnalist yazısı adlana bilərmi? Zəhmət çəkib faktları araşdırmaq, dəqiqləşdirmək əvəzinə “dəli quyuya bir daş atdı” ideyasını fırladan boşboğazlar özlərini gülünc vəziyyətə salır, jurnalist sözünü də gözdən salırlar (onsuz da indi dəli ilə ağıllını ayırmaq çox çətinləşib). İndi soruşan gərək, ay əbləh, bu məlumatı sənə kim verib, mərhumun özü? Əgər vaxtında bilirdinizsə, niyə lazımi orqanlara xəbər verməmisiniz? Bəlkə cinayətkarın böyüyü elə sizsiniz? (Elə bircə jurnalist olmadığınız halda jurnalistik fəaliyyəti göstərdiyinizə görə sizdən böyük cinayətkar saymırıq. Elə deyilsə, səs verin insanlar da bilsin).
Bu mövzu ilə bağlı Pedaqoji fakültənin dekanı Zaur Hüseynzadə ilə əlaqə saxladıq. – İş ilə bağlı lazımi orqanlarda araşdırmalar aparılmış, mərhumun “aylığa çıxmağı” kimi fikirlər öz əksini tapmamışdır. Tədris jurnallarında tələbənin dərslərdə iştirak etmədiyi günlərin hamısında “qayıb” qoyulmuşdur. Bu iddianın özü bir absurddur. Nə bizim fakültədə, nədə ki, digər fakültələrdə belə halların olması qeyri-mümkündür və bu absurd fikirlər universitetin ümumi adına olan bir yalandır. – Zaur müəllim bildirir.
Onu da qeyd edək ki, Pedaqoji fakültədə 2022-ci ilin aprel ayından fakültənin dekanı dos. Zaur Rafael oğlu Hüseynzadədir.