Fövqəladə Hallar Nazirliyinin Gəncə Regional Mərkəzində keçirilən tədbirdə Gəncə Şəhər İcra Hakimiyyətinin başçısı Niyazi Bayramov, Gəncə Şəhər Məhkəməsinin sədri Xaqani Tağıyev, YAP Gəncə şəhər təşkilatının sdəri Bayram Aslanov, Mərkəzin rəisi, polkovnik Rövşən Nəbiyev, ADAU-nun rektoru Zəfər Qurbanov, hüquq-mühafizə orqanlarının, idarə, müəssisə və təşkilat rəhbərləri, eləcə də FHN əməkdaşları iştirak ediblər.
Əvvəlcə tədbir iştirakçıları Mərkəzin həyətində ucaldılmış Ümummilli Lider Heydər Əliyevin abidəsi önünə gül dəstələri düzüb, əziz xatirəsini ehtiramla yad ediblər.
Tədbirdə Azərbaycan Respublikasının Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla anılıb.
Polkovnik Rövşən Nəbiyev çıxış edərək 2005-ci ildə cənab Prezident İlham Əliyevin Sərəncamına əsasən Fövqəladə Hallar Nazirliyinin yaradılmasından, qurumun strukturu və fəaliyyət istiqamətlərindən danışıb. O, Nazirliyin 20 illik fəaliyyəti dövründə ölkədə fövqəladə halların qarşısının alınması və nəticələrinin aradan qaldırılması sahəsində görülən işlər, həmçinin Gəncə Regional Mərkəzinin əhatə etdiyi ərazilərdə həyata keçirilən tədbirlər barədə ətraflı məlumat verib.
Niyazi Bayramov çıxışında təbii və texnogen mənşəli fövqəladə halların nəticələrinin aradan qaldırılması istiqamətində Fövqəladə Hallar Nazirliyinin uğurlu fəaliyyətini qeyd edib. O bildirib ki, bu illər ərzində Nazirlik həm ölkəmizdə, həm də müxtəlif ölkələrdə baş verən təbii fəlakətlərin nəticələrinin aradan qaldırılmasında iştirak edib.
Bayram Aslanov vurğulayıb ki, Ulu Öndər Heydər Əliyevin ideyalarına söykənən və cənab Prezident İlham Əliyevin diqqət və qayğısını daim hiss edən Fövqəladə Hallar Nazirliyinin kollektivi bundan sonra da vətəndaşların təhlükəsizliyinin təmin olunması istiqamətində bütün gücü ilə çalışacaq, Ali Baş Komandanın əmr və tapşırıqlarını uğurla yerinə yetirəcəkdir.
Digər çıxış edən natiqlər də Nazirliyin müxtəlif dövrlərdə həyata keçirdiyi uğurlu fəaliyyətlərdən bəhs ediblər.
Sonda Fövqəladə Hallar Nazirliyinin fəaliyyəti haqqında film nümayiş olunub.
