10 dekabr 2025-ci il tarixində İsrafil Məmmədov Ev Muzeyində Gəncə–Daşkəsən Regional Mədəniyyət İdarəsi və İsrafil Məmmədov Ev Muzeyinin təşkilatçılığı ilə “İlk Azərbaycanlı Sovet İttifaqı Qəhrəmanı İsrafil Məmmədovun Ev Muzeyinin yaranmasından 40 il ötür” başlığı altında tədbir keçirildi. Muzey 1985-ci ildə ictimai əsaslarla fəaliyyətə başlasa da, məhz Ulu Öndər Heydər Əliyevin təşəbbüsü ilə 1990-cı ildən dövlət statuslu muzey kimi fəaliyyət göstərməyə başlamışdır.
PatriotNews.az–ın verdiyi məlumata görə, tədbirdə ziyalılar, qəhrəmanın yaxın qohumları, şəhid ailələri və müxtəlif qurumların nümayəndələri iştirak ediblər. İştirakçılar öz çıxışlarında muzeyin dörd onillik ərzində gördüyü işləri yüksək qiymətləndirərək, onun milli yaddaşın qorunmasına verdiyi töhfələri xüsusi vurğulamışlar.
Natiqlər Sovet İttifaqı Qəhrəmanı İsrafil Məmmədovun həyat yolundan və xalqımız üçün əvəzsiz olan qəhrəmanlıq nümunələrindən bəhs etmiş, bu qəhrəmanlıq tarixinin gənc nəslə çatdırılmasında muzeyin mühüm rol oynadığını qeyd etmişlər. Çıxış edənlər bildiriblər ki, muzey təkcə tarixi faktların toplandığı bir məkan deyil, həm də vətənpərvərlik tərbiyəsinin mühüm ocağıdır.
Qonaqlar muzey kollektivinin fədakar fəaliyyətini yüksək dəyərləndirərək, 40 il ərzində eksponatların qorunması, maarifləndirici tədbirlərin keçirilməsi və qəhrəmanın irsinin geniş təbliği istiqamətində görülən işlərin önəmini xüsusi vurğulamışlar.
Sonda muzeyin rəhbəri Nəimi Mustafayev tədbir iştirakçılarına minnətdarlığını bildirib, İsrafil Məmmədovun adının hər zaman uca tutulmasının vacibliyini qeyd edib və tədbirin təşkilində əməyi olan hər kəsə, o cümlədən Mədəniyyət İşçiləri Həmkarlar İttifaqı Gəncə şəhər komitəsinə dərin təşəkkürünü çatdırıb.
Tədbir Gəncə şəhər 5 saylı Uşaq Musiqi Məktəbinin muğam üçlüyünün ifaları ilə yekunlaşıb.
@Patriot News.az
