ABŞ-nın Azərbaycandakı müvəqqəti işlər vəkili Huqo Gevara Gəncə şəhərinə səfər edib. Səfər çərçivəsində Gəncə Şəhər İcra Hakimiyyətinin başçısı Niyazi Bayramovla görüşüb.
Niyazi Bayramov qonağı Gəncə şəhərində görməkdən məmnun olduğunu bildirib. O qeyd edib ki, tarixi İpək yolu üzərində yerləşən Gəncə sənaye sahəsində inkişaf etmiş şəhərlərdəndir. Tarixən elm və mədəniyyət mərkəzi hesab edilən şəhər müxtəlif illərdə bir sıra beynəlxalq layihə, festival və titullara ev sahibliyi edib. Söhbət zamanı şəhər rəhbəri Gəncə ilə ABŞ arasında olan əlaqələrdən də söz açıb.
Huqo Gevara Gəncəyə ilk dəfə səfər etdiyini bildirib və səmimi görüşə görə Niyazi Bayramova təşəkkür edib. Gəncə şəhərinə səfərinin məqsədindən söz açan amerikalı diplomat, burada bir sıra görüşlərin keçirəcəyini diqqətə çatdırıb. O qeyd edib ki, ikigünlük səfəri çərçivəsində Gəncənin Ermənistan silhalı qüvvələri tərəfindən raket hücumuna məruz qalan ərazisinə ziyarət edəcək, Gəncə şəhər 28 nömrəli tam orta məktəbin İngilis dili sinfinin açılışına qatılacaq. Bununla yanaşı, Gəncə şəhər Mərkəzi Kitabxana Sistemində yaradılan “Amerika güşəsi”nə, Təmas” Regional İnkişaf İctimai Birliyinin nəzdində fəaliyyət göstərən İnsan alveri və insan alverinin potensial qurbanlarına xidmət göstərən regional reabilitasiya reinteqrasiya mərkəzini və Azərbaycan Dövlət Aqrar Universitetini ziyarət edəcəyini bildirib.
Görüşün sonunda hədiyyələr təqdim olunub, xatirə şəkli çəkdirilib.
