Gəncədə Azərbaycanın Milli Qəhrəmanı Natiq Qasımovun xatirəsinə həsr olunmuş “Düşmənə qarşı tək” filminin təqdimatı, şübhəsiz ki, təqdirəlayiq təşəbbüsdür. Belə layihələr qəhrəmanlarımızın şücaətinin tanıdılması, tarixi yaddaşımızın qorunması və gənc nəslin vətənpərvərlik ruhunda tərbiyəsi baxımından mühüm əhəmiyyət daşıyır.
Lakin bu cür tədbirlərin təşkili zamanı bir məqamın da nəzərə alınması vacibdir: qəhrəmanlıqdan bəhs edən tədbirlərdə qəhrəmanların yolunu davam etdirən, onların xatirəsini yaşadan insanlara da yer ayrılmalıdır.
Təəssüf ki, Milli Qəhrəman Natiq Qasımova həsr olunmuş filmin təqdimatına Qarabağ Qaziləri İctimai Birliyinin Gəncə filialının üzvləri, eləcə də Milli Qəhrəmanın qəhrəmanlıq yoluna həsr olunmuş kitabın müəllifi Ruhulla Zahidov dəvət edilməyiblər.
Bu hal istər-istəməz sual doğurur: Vətən uğrunda döyüşmüş insanların və qəhrəmanlarımızın həyatını, mübarizəsini qələmə alan müəlliflərin belə tədbirlərdə iştirakı niyə diqqətdən kənarda qalır?
Təəssüf ki, bu, yalnız bir tədbirlə bağlı irad deyil. Vətənpərvərlik və qəhrəmanlıq mövzusunda keçirilən bəzi tədbirlərdə qazilərin, döyüşçülərin və qəhrəmanlarımız haqqında kitablar yazan müəlliflərin unudulması halları ilə qarşılaşırıq.
Halbuki belə tədbirlərdə məhz döyüşçülərin, qazilərin, şəhid ailələrinin və qəhrəmanların həyat yolunu araşdıraraq gələcək nəsillərə çatdıran insanların iştirakı xüsusi əhəmiyyət daşıyır. Onların iştirakı tədbirlərə yalnız mənəvi dəyər qatmır, həm də gənclərə canlı tarixlə görüşmək imkanı yaradır.
Təbii ki, hər tədbirin iştirakçı siyahısı və təşkilati imkanları fərqli ola bilər. Məsələyə kimsəni ittiham etmək mövqeyindən deyil, gələcəkdə belə halların təkrarlanmaması üçün diqqətə çatdırılan bir irad kimi yanaşılmasını istərdik.
Gəncə Şəhər İcra Hakimiyyətinin və tədbirin digər təşkilatçılarının gələcəkdə bu məsələyə daha həssas yanaşacağına ümid edirik. Vətən uğrunda döyüşənlərə, qazilərə və qəhrəmanlarımızın irsini yaşadan müəlliflərə diqqət göstərmək təkcə nəzakət məsələsi deyil, həm də milli yaddaşa və tarixi məsuliyyətə hörmətin ifadəsidir.
Ceyhun Əliyev
Patriot News.com.az
