Gəncə Dövlət Universitetinin Ümumi texniki fənlər və texnologiya kafedrasının əməkdaşları, dosent E.K.Yaqubov və dosentE.M.Cavadov tərəfindən ali məktəb tələbələri üçün hazırlanmış “Materialşünaslıq” adlı dərslik Azərbaycan Respublikasının Elm və Təhsil Nazirliyinin müvafiq əmri ilə qrifləndirilib və “Müəllim” nəşriyyatında çap olunub. Dərsliyə respublikanın bu sahə üzrə tanınmış alimlərindən Azərbaycan Dövlət Dəniz Akademiyasının “Gəmiqayırma və gəmi təmiri” kafedrasının professoru, texnika elmləri doktoru Nizami Şayı oğlu İsmayılov, Azərbaycan Dövlət Neft və Sənaye Universitetinin “Materialşünaslıq və emal texnologiyaları” kafedrasının müdiri, texnika elmləri doktoru, professor TahirQaffar oğlu Cabbarov, VEKTOR Beynəlxalq Elmlər Akademiyasının Prezidenti, Əməkdar müəllim, texnika elmləri doktoru, professor Elçin Barat oğlu İsgəndərzadə, Azərbaycan Dövlət Aqrar Universitetinin “Texniki mexanika və maşın mühəndisliyi” kafedrasının müdiri, texnika elmləri doktoru, professor Cəmaləddin Ələkbər oğlu Məmmədov, Azərbaycan Texniki Universitetinin “Xüsusi texnologiyalar və avadanlıqlar” kafedrasının dosenti, texnika üzrə fəlsəfə doktoru Çingiz Mirzəmməd oğlu Məmmədov tərəfindən müsbət rəy verilmişdir.
Ali təhsil müəssisələrində texniki və texnologiya yönümlü ixtisaslar üzrə mütəxəssis hazırlığında mühüm əhəmiyyət daşıyan “Materialşünaslıq” fənni gələcək mütəxəssislərin müxtəlif materialların quruluşu, tərkibi, xassələri, hazırlanması, emalı və tətbiq sahələri haqqında fundamental biliklərə yiyələnməsində mühüm rol oynayır.
Bu baxımdan dosent E.M. Cavadov və dosent E.K. Yaqubovun müəllifi olduğu yeni dərslik ali məktəb tələbələrinin materialşünaslıq sahəsində nəzəri və praktik biliklərinin formalaşdırılmasına yönəlmiş mühüm tədris mənbələrindən biri kimi diqqəti cəlb edir.
Materialşünaslıq müasir texnika və istehsalın elmi əsaslarından biri hesab olunur. Maşınqayırma, energetika, nəqliyyat, tikinti, metallurgiya, istehsal və digər texniki sahələrdə istifadə olunan materialların düzgün seçilməsi onların istismar müddətinə, möhkəmliyinə, etibarlılığına, təhlükəsizliyinə və iqtisadi səmərəliliyinə birbaşa təsir göstərir. Bu səbəbdən gələcək mühəndis və texnologiya profilli mütəxəssislərin materialların xassələrini və tətbiq imkanlarını dərindən mənimsəməsi xüsusi əhəmiyyət daşıyır.
“Materialşünaslıq” dərsliyi tələbələrə materialların daxili quruluşu ilə onların fiziki, mexaniki, kimyəvi və texnoloji xassələri arasındakı əlaqələri öyrənmək, müxtəlif materialları müqayisə etmək, onların tətbiq sahələrini müəyyənləşdirmək və konkret texnoloji məsələlərin həllində material seçiminin əsaslarını mənimsəmək baxımından imkan yaradır.
Dərsliyin Azərbaycan dilində hazırlanması da xüsusi əhəmiyyət daşıyır. Ali təhsilin texniki istiqamətlərində ana dilində elmi və tədris ədəbiyyatının zənginləşdirilməsi tələbələrin ixtisas fənlərini daha dərindən mənimsəməsinə, elmi-texniki terminologiyanın formalaşmasına və milli tədris resurslarının genişlənməsinə xidmət edir.
Hazırda sənaye və texnologiyanın sürətli inkişafı yeni materialların və müasir material emalı texnologiyalarının meydana çıxmasını şərtləndirir. Yüksək möhkəmlikli, xüsusi xassəli, kompozit və digər müasir materialların tətbiq dairəsinin genişlənməsi materialşünaslıq üzrə biliklərə olan tələbatı daha da artırır. Bu baxımdan dərsliyin ali təhsil müəssisələrinin tədris prosesinə təqdim olunması aktual elmi və pedaqoji əhəmiyyət daşıyır.
Dərsliyin Azərbaycan Respublikasının Elm və Təhsil Nazirliyi tərəfindən qrifləndirilməsi onun ali təhsil müəssisələrində tədris ədəbiyyatı kimi istifadəsi üçün mühüm mərhələdir. Dərslik “Müəllim” nəşriyyatında çap olunaraq tələbə və müəllimlərin istifadəsinə təqdim edilib.
Qeyd edək ki, “Materialşünaslıq” dərsliyi yalnız çap formasında deyil, elektron variantda da ali təhsil ictimaiyyətinin istifadəsinə təqdim olunub. Dərsliyin nüsxələri Azərbaycan Milli Kitabxanasına, həmçinin Azərbaycan Respublikası Prezidentinin İşlər İdarəsinin Prezident Kitabxanasına(https://www.preslib.az/az/elibrary/ebook/SnCzv4O) yerləşdirilib.
Bununla yanaşı, müəlliflər tərəfindən dərsliyin çap olunmuş nüsxələrindən bir neçə ədəd respublikada fəaliyyət göstərən müxtəlif universitetlərin kitabxanalarına da hədiyyə edilib. Beləliklə, nəşrin ali təhsil müəssisələrində tələbə və müəllimlərin istifadəsinə verilməsi və onun kitabxana fondlarında yer alması təmin olunub.
Dərsliyin ali məktəb kitabxanalarına təqdim edilməsi onun elmi və tədris resursu kimi daha geniş auditoriyaya çatdırılmasına, tələbələrin müvafiq fənn üzrə əlavə mənbədən istifadə imkanlarının artırılmasına şərait yaradır.
Gəncə Dövlət Universitetinin Ümumi texniki fənlər və texnologiya kafedrasının əməkdaşları tərəfindən hazırlanmış bu nəşr universitetin elmi-pedaqoji fəaliyyətinin və ali təhsil üçün tədris-metodik ədəbiyyat hazırlanması istiqamətində görülən işlərin nümunələrindən biri kimi qiymətləndirilə bilər.
Dərsliyin ali təhsil müəssisələrində texniki və texnologiya istiqamətləri üzrə təhsil alan tələbələr, ali məktəb müəllimləri və materialşünaslıq sahəsinə maraq göstərən mütəxəssislər üçün faydalı elmi-tədris mənbəyi kimi istifadə olunması nəzərdə tutulur.