ADA Universitetinin müəllim və tələbələri dahi bəstəkar Üzeyir Hacıbəylinin “O olmasın, bu olsun” operettasını növbəti dəfə peşəkar teatr səhnəsində təqdim ediblər.
Sentyabrın 19-da XVIII Üzeyir Hacıbəyli Beynəlxalq Musiqi Festivalı çərçivəsində Gəncə Dövlət Milli Dram Teatrında nümayiş olunan tamaşa Azərbaycan Respublikasının Mədəniyyət Nazirliyi, Heydər Əliyev Fondu və teatrın dəstəyi ilə baş tutub.
Tamaşanı Gəncə Şəhər İcra Hakimiyyətinin başçısı Niyazi Bayramov, ADA Universitetinin rektoru, səfir Hafiz Paşayev, mədəniyyət nazirinin müavini Murad Hüseynov, Gürcüstanın Gəncədəki Baş konsulu Kaxaber Abdaladze, Türkiyənin Gəncədəki vitse-konsulu Yiğit Yalın Soyel, Azərbaycan Dövlət Aqrar Universitetinin rektoru Zəfər Qurbanov, Azərbaycan Texnologiya Universitetinin rektoru Yaşar Ömərov, AMEA-nın Gəncə Bölməsinin sədri Fuad Əliyev, Səhiyyə Nazirliyinin Gəncə Tibb Kollecinin direktoru Mehman Rzayev, Azərbaycan Dövlət Aqrar Kollecinin direktoru Fəqan Ağayev, tələbə-gənclər və şəhər sakinləri izləyiblər.
Tamaşa ADA Universitetinin nəzdində fəaliyyət göstərən Musiqi, Rəqs və Teatr klublarının həvəskar gənclərdən ibarət yaradıcı heyəti tərəfindən hazırlanıb.
“O olmasın, bu olsun” operettasının premyerası bu il martın 6-da ADA Universitetinin 20 illik yubileyi münasibətilə keçirilib. Gəncə Dövlət Milli Dram Teatrının səhnəsindəki təqdimat isə yaradıcı heyətə əsəri peşəkar teatr səhnəsində daha geniş auditoriyaya nümayiş etdirmək imkanı yaradıb.
Qeyd edək ki, bu layihə sözügedən klubların ilk böyük səhnə işi deyil. Bundan əvvəl yaradıcı gənclər Üzeyir Hacıbəylinin digər məşhur əsəri – “Arşın mal alan” operettasını da Azərbaycan Dövlət Akademik Musiqili Teatrının səhnəsində təqdim ediblər.
